Toshkent shahrida faoliyat yurituvchi yagona ayol hokim — Yakkasaroy tumani hokimi Nilufar Allabergenova “Daryo” jurnalisti bilan suhbati davomida poytaxtda faoliyat yurituvchi barcha hokimlar unga yordam berib, ustozlik qilishini, qo‘llab-quvvatlashini gapirib berdi.
“Yurtboshimizning o‘zlari menga ishonch bildirganliklari katta kuch va motivatsiya beradi. Qolaversa, shahar hokimining shaxsan o‘zi, 11 ta tuman hokimlari “opa bosing, yaxshi ketyapsiz, shunaqa qilsa zo‘r bo‘ladi”, deb qo‘llab-quvvatlab turishadi. Hokimlarning shu gapi menga kuch beradi”, deydi Nilufar Allabergenova.
Nilufar Allabergenovaning so‘zlariga ko‘ra, faoliyat yuritayotganiga endigina sakkiz oy bo‘lgan bo‘lsa-da, o‘tgan fursat davomida ancha tajriba orttirgan.
“Dastlab, ‘hokim bo‘lasiz’ deyishganida eplay olarmikinman, prezidentimiz bildirayotgan ishonchni oqlay olarmikinman degan qo‘rquv bo‘lgan. Chunki ayol kishiman-ku, baribir qo‘rquv bo‘ladi. Ish boshlaganimga ko‘p bo‘lmadi, biroq hammaning qo‘llab-quvvatlovi bilan ishlab kelyapman. Eplayapman. Meni nafaqat shahar hokimi, davlatimiz rahbari, sektor rahbarlari va aholi qo‘llab-quvvatlamoqda. Sektor rahbarlari va yoningizdagilar sizni qo‘llab-quvvatlasa natijaga erishsa bo‘ladi”, deydi u.
Nilufar Allabergenova “Daryo” jurnalisti bilan suhbatda Yakkasaroy tumaniga tashrif buyurgan davlat rahbarining e’tirofi, shuningdek, hokim sifatidagi xato-kamchiliklarini tahlil qilib boruvchi asosiy tanqidchisi onasi ekani haqida ham gapirgandi.
Izoh (0)