Toshkent shahrida faoliyat yurituvchi yagona ayol hokim — Nilufar Allabergenova “Daryo” jurnalisti bilan suhbatda Yakkasaroy tumaniga tashrif buyurgan davlat rahbarining e’tirofi, shuningdek, hokim sifatidagi xato-kamchiliklarini tahlil qilib boruvchi asosiy tanqidchisi onasi ekani haqida gapirdi.
Onam hokimlikning Telegram kanalida e’lon qilinayotgan har bir xabarni diqqat bilan o‘qib, mening xato-kamchiliklarimni kuzatib turadi. Uyga qaytganimda xatomni aytib, “Mana shu joyda xato qilding, shu yerda noto‘g‘ri qarading, noto‘g‘ri gap gapirding”, deb dakki beradilar. Otam esa o‘qituvchi bo‘lganlar, shu sabab nimadir xato qilsam, menga urishib, takrorlamasligim uchun ogoh qilib turishadi, — deydi Yakkasaroy tumani hokimi ota-onasi haqida gapirar ekan.
Tuman hokimining aytishicha, uning har bir harakatining tag zamirida xalqni rozi qilish maqsadi yotadi.
Har bir ishga bosh-qosh bo‘lib, nimadir ish qilish uchun tayyorgarlik ko‘rayotganimizda shu tadbirimiz xalqqa yoqarmikin, ularni rozi qila olarmikinmiz degan o‘y bilan boshlanadi. Tan olish kerak, bir vaqtda hammani rozi qilib bo‘lmaydi. Har bir ishning kimlargadir yoqmaydigan tomonlari ham bo‘ladi. Lekin o‘sha kuni bir fuqaroning 10 ta muammosidan bittasiga yechim topib, uni rozi qilib ortga qaytarsam, o‘sha kuni uyimga borib, tinch o‘xlayman, — deydi Nilufar Allabergenova.
Hokimning aytishicha, u har kuni ishdan so‘ng “Men bugun kimgadir yordam bera oldimmi? Yordamim tegdimi?”, — degan savolga javob izlashga odatlangan.
Har kuni ertalab onamning duosini olib ishga chiqaman. Va ishdan qaytayotganimda bugun hokim sifatida kimgadir yordam bera oldimmi, yordamim tegdimi degan savollarni o‘zimga beraman va tayinli javob qilishga harakat qilaman, — deydi hokim.
Izoh (0)