“Опа, босинг дейишади”. Яккасарой ҳокими Тошкент шаҳридаги барча ҳокимлар устози эканини, уни қўллаб-қувватлашларини айтди

Тошкент шаҳрида фаолият юритувчи ягона аёл ҳоким — Яккасарой тумани ҳокими Нилуфар Аллабергенова “Дарё” журналисти билан суҳбати давомида пойтахтда фаолият юритувчи барча ҳокимлар унга ёрдам бериб, устозлик қилишини, қўллаб-қувватлашини гапириб берди. 

“Юртбошимизнинг ўзлари менга ишонч билдирганликлари катта куч ва мотивация беради. Қолаверса, шаҳар ҳокимининг шахсан ўзи, 11 та туман ҳокимлари “опа босинг, яхши кетяпсиз, шунақа қилса зўр бўлади”, деб қўллаб-қувватлаб туришади. Ҳокимларнинг шу гапи менга куч беради”, дейди Нилуфар Аллабергенова. 

Нилуфар Аллабергенованинг сўзларига кўра, фаолият юритаётганига эндигина саккиз ой бўлган бўлса-да, ўтган фурсат давомида анча тажриба орттирган. 

“Дастлаб, ‘ҳоким бўласиз’ дейишганида эплай олармикинман, президентимиз билдираётган ишончни оқлай олармикинман деган қўрқув бўлган. Чунки аёл кишиман-ку, барибир қўрқув бўлади. Иш бошлаганимга кўп бўлмади, бироқ ҳамманинг қўллаб-қувватлови билан ишлаб келяпман. Эплаяпман. Мени нафақат шаҳар ҳокими, давлатимиз раҳбари, сектор раҳбарлари ва аҳоли қўллаб-қувватламоқда. Сектор раҳбарлари ва ёнингиздагилар сизни қўллаб-қувватласа натижага эришса бўлади”, дейди у.

Нилуфар Аллабергенова “Дарё” журналисти билан суҳбатда Яккасарой туманига ташриф буюрган давлат раҳбарининг эътирофи, шунингдек, ҳоким сифатидаги хато-камчиликларини таҳлил қилиб борувчи асосий танқидчиси онаси экани ҳақида ҳам гапирганди. 

2019 йилдан 2023 йилга қадар Яккасарой тумани прокурори сифатида фаолият юритиб келган Нилуфар Аллабергенова ўтган йилнинг октябрида Яккасарой тумани ҳокими лавозимига тайинланганди.