Toshkent shahridagi yagona ayol hokim — Yakkasaroy tumani rahbari Nilufar Allabergenova unga murojaat qilib, uy ta’miri va sog‘lig‘idagi muammolardan shikoyat qilgan murojaatchi xonadoniga bordi. Bu haqda “Daryo”ga hokimlik axborot xizmati rahbari Otabek Nasimov xabar berdi.
Mas’ulning bildirishicha, murojaatchi xonadonida bo‘lgan hokim mas’ullarga ayolning uyini ta’mirlash, o‘zini esa davolatishga ko‘rsatma bergan.
Kuni kecha Yakkasaroy tumanidagi “Qushbegi” mahallasida joylashgan 23-sonli ko‘p qavatli uyda istiqomat qiluvchi Dilrabo Kubayeva hokimlikka murojaat qilib, yashab kelayotgan xonadoni ta’mirtalabligini, sog‘lig‘ida muammolari borligi aytib yordam so‘ragan edi. Fuqaro murojaatini o‘rganish maqsadida tuman hokimi Nilufar Allabergenova o‘rinbosari – Oila va xotin-qizlar tuman bo‘limi boshlig‘i Dildora Ismoiljonova bilan birga uning xonadonida bo‘ldi. O‘rganish davomida fuqaroning barcha murojaatlari eshitilib, mas’ullarga murojaatchini “Ayollar daftariga” kiritish, sog‘ligini tiklashi uchun barcha dori-darmonlarini olib berish, uy ta’mirini jamg‘arma hisobidan qilib berish haqida topshiriq berdi, — deydi hokimlik axborot xizmati rahbari Otabek Nasimov.
Ta’kidlanishicha, hokim mahallaning xotin-qizlar faoliga fuqaroning murojaatlari bo‘yicha kerakli hujjatlarni o‘rganib, Oila va xotin-qizlar tuman bo‘limi boshlig‘i Dildora Ismoiljonovaga yetkazib berishi bo‘yicha ko‘rsatma bergan.
-Rwb2Eqct.jpg)
Eslatib o‘tamiz, Nilufar Allabergenova Yakkasaroyning sobiq hokimi Anvar Sayfutdinovdan so‘ng uning o‘rnini egallab, poytaxt shahardagi yagona ayol hokim sifatida ishlab kelmoqda. U 2019-yildan hokimlikka qadar Yakkasaroy tumani prokurori sifatida faoliyat yuritib kelgan.
Izoh (0)