Shimoliy Koreya harbiylari 27-iyun kuni yangi yadroviy raketani sinovdan o‘tkazgan. Bu haqda Shimoliy Koreya markaziy axborot agentligi tarqatgan xabarga asoslanib, New York Times maʼlumot berdi.
Manbada aytilishicha, yangi sinovlar Shimoliy Koreyaning yadroviy arsenalini kuchaytirish hamda bir nechta nishonlarni mustaqil tarzda yo‘q qila oladigan tizimni samarali ishga tushirish uchun o‘tkazilgan.
Yangi raketa strategik va taktik jihatdan ancha samarali va “halokatli” ekani xabar qilingan. Chunki bu raketa bir paytning o‘zida bir nechta yadro kallaklarini ko‘tarib ucha oladi. Ayni paytda kallaklarni seriyali tarzda turli manzillarga aniqlikda uloqtira oladi.
Yangi ishlab chiqilgan MIRV raketasi Shimoliy Koreyaning Qo‘shma Shtatlar va uning ittifoqchilariga tahdidini keskin oshiradi. Chunki havoda manyovrlar amalga oshira oluvchi bu qurol mudofaa tizimlari tomonidan tutib olishga juda qiyin.
Janubiy Koreya armiyasi vakili polkovnik Li Sung Jun Shimolning yangi raketa haqidagi daʼvolarini rad etib, “aldash va bo‘rttirish” deya taʼriflagan. Pxenyan hech qanday MIRV’ni emas balki navbatdagi gipertovushli raketani sinovdan o‘tkazganini maʼlum qilgan.
G‘arb nashrlari Shimolning yangi raketa sinovlari Rossiya bilan hamkorlikning bir qismi ekanligini bildirgan. Prezident Putinning Pxenyanga tashrifi davomida erishilgan mudofaa, harbiy-strategik hamda yadroviy kelishuvlarga muvofiq yangi qurollar namoyish qilinayotgani bildirilgan.
Izoh (0)