Isroil armiyasi 1-iyul kuni G‘azo janubidagi Xon Yunus va Rafah shaharlaridan aholining bir qismini evakuatsiya qilish to‘g‘risida buyruq chiqardi. Bu haqda Al Arabiya nashri xabar berdi.
Harbiylar G‘azo janubidagi aholi punktlariga ogohlantirish yuborib, hududni tark etishni buyurgan. Ushbu bayonotdan so‘ng minglab falastinliklar shimolga qarab qocha boshlagan.
Rafahdagi Al-Qarara, Bani Suhayla va yana ikkita aholi punktlarida umumiy evakuatsiya boshlangan. Aholi tartibsiz ravishda qochqinlar lagerlarini tark etgan.
Ushbu yangi evakuatsiya dasturi Xon Yunus hududidan Isroilga 20 ta snaryad uloqtirilishi bilan bog‘liq ekani xabar qilingan. Isroil harbiylari snaryadlar kim tomonidan uloqtirilganini aniqlay olmagan va evakuatsiya rejasi ishlab chiqqan.
Falastinning “Islom jihodi” guruhi hujum uchun javobgarlikni o‘z zimmasiga olgan. Bunga javoban Isroil Rafah va G‘azo sharqiga havo hujumlari uyushtira boshlagan.
“Evakuatsiya buyrug‘i berilganidan keyin odamlarni qo‘rquv va haddan tashqari xavotir qamrab oldi. Aholining katta qismi ko‘chib ketdi”, — degan Bani Suhayla shahrida yashovchi Ahmad Najjar ismli shaxs.
Tel-Aviv rasmiylari evakuatsiya oqibatida qancha falastinlik hududni tark etganini maʼlum qilmagan. Rafah janubiga qo‘shimcha harbiy qismlar va tanklar olib kirilgan.
Izoh (0)