Shimoliy Koreya harbiylari 1-iyul kuni Yapon dengizi tomon ikkita yirik ballistik raketa uchirgan. Bu haqda Janubiy Koreyaning Yonhap agentligi xabar tarqatgan.
Ballistik raketalar dushanba kuni tonggi 5:05 va 5:15 da Janubiy Hvanhe provinsiyasining Jangyon hududidan uchirilgan. Raketalar shimoli-sharqiy yo‘nalish bo‘ylab Yapon dengizi tomon harakatlangan.
Ballistik raketalar Janubiy Koreya armiyasi AQSH va Yaponiya bilan hamkorlikda o‘tkazgan qo‘shma harbiy mashg‘ulotlarga qarshi javob chorasi tarzida uchirilgani taxmin qilingan. Raketalar turi va halokat olib kelish darajasi haqida maʼlumot yo‘q, chunki Pxenyan bu kabi qurolni oldin sinovdan o‘tkazmagan.
Raketalar qancha masofaga uchib borgani nomaʼlum. Janubiy Koreya harbiylari ular dengizga qulab tushgan bo‘lishi mumkinligi haqida xabar tarqatgan.
Yakshanba kuni Shimoliy Koreya Tashqi ishlar vazirligi uch kunlik davom etgan AQSH, Yaponiya va Janubiy Koreya ishtirokidagi harbiy mashqlarni keskin qoralagan. “Ozodlik qalqoni” operatsiyasi hech qanday mashg‘ulot emas, balki tahdid va xatar ekanini taʼkidlagan.
Maʼlumot o‘rnida, Rossiya prezidentining Pxenyanga tashrifi va harbiy pakt imzolanishi ortidan yarimorolda keskinlik nihoyatda kuchaydi. Avvaliga Shimoliy Koreya bir necha yadro kallagini ko‘tarib ucha oladigan raketasini namoyish etdi va sinovini o‘tkazdi. Keyinroq esa bu harakatga javoban AQSH aviatashuvchilari va harbiy kemalari Yapon dengiziga kirgan.
Izoh (0)