“Kun.uz” nashrida Toshkent metrosining yopiq vestibyullari hali ham ochilmagani, masʼullar may oyigacha ochilishini vaʼda qilgani xususida maqola eʼlon qilingan edi. Unda “Milliy bog‘”, “G‘afur G‘ulom”, “O‘zbekiston”, “Yunus Rajabiy” va “Mashinasozlar” bekatlaridagi ikkinchi kirish-chiqish joylari ochilmagani aytilgan.
Holat yuzasidan “Toshkent metropoliteni” DUK matbuot xizmati munosabat bildirdi. Maʼlum qilinishicha, 30-40 yil ilgari barpo etilgan Toshkent metropolitenining yer osti bekatlaridan beshtasining ikkinchi vestibyullarida qurilish ishlari oxiriga yetkazilmagan holatda foydalanishga topshirilgan.
Metro tizimiga bo‘lgan talab kun sayin ortib borayotganligi va shu boisdan ham yo‘lovchilarga qo‘shimcha qulaylik yaratish maqsadida, 2023-yilda “Toshkent metropoliteni” DUK tomonidan bu vestibyullar faoliyatini yo‘lga qo‘yishga doir tashabbuslar tegishli tartibda hukumat muhokamasiga taqdim etildi va hukumat tomonidan bu ishlar amalga oshirilishiga ruxsat berilgan.
Shundan so‘ng Toshkent metropoliteni qoshida ochilgan “Toshmetrotrans” MCHJ loyiha instituti tomonidan barcha yopiq vestibyullarni ishga tushirish bo‘yicha loyihalar ishlab chiqilib, davlat ekspertizasiga topshirildi. Hozirgi kunga kelib, loyihalar bo‘yicha tegishli xulosalar olingan bo‘lib, qurilishni amalga oshiruvchi tashkilot aniqlanishi uchun bu loyiha tenderga joylashtirilgan. Bu jarayon bosqichma-bosqich shaklda amalga oshishini inobatga olgan holda, qurilish ishlari yaqin bir oy muddatda boshlanadi. Qurilishning tugash muddati xususida esa, qurilish jarayonlarining texnik holatiga ko‘ra qo‘shimcha maʼlumot taqdim etiladi, – deyiladi munosabatda.
Qo‘shimcha qilinishicha, “Xalqlar do‘stligi” bekatida mavjud eskalatorni yangisiga almashtirish maqsadida yopilgan ikkinchi vestibyulda hozirda jadal ishlar amalga oshirilmoqda va bu vestibyul faoliyati bir oy muddatda qayta yo‘lga qo‘yiladi.
Izoh (0)