“Жиззахдаги АЭС қурилишига маҳаллий ва россиялик қурувчилар жалб этилади” — Отабек Омонов

Ўзбекистонда қуриладиган атом электр станциясига маҳаллий қурувчилар, қурилиш, машинасозлик корхоналари жалб этилади. Бу ҳақда “Дарё” мухбири билан суҳбатда “Ўзатом” агентлиги ҳузуридаги АЭС қурилиши дирексияси директори Отабек Омонов маълум қилди.

Отабек Омоновнинг айтишича, Жиззах вилоятида АЭС қурилиш ишлари жорий йил август ойи бошида бошланади.

Шартномага асосан ҳар бири 55 МW қувватли 6 та реактор (жами 330 МW) қурилиши режалаштирилган. Биринчи блок 6 та блокдан иборат бўлади ва у 5 йилдан кейин ишга тушади. Қолганлари режа бўйича 6 ойдан 1 йилгача (ҳар бири) бўлган вақтда қуриб битказилади. Умумий ҳисобда АЭС 7-8 йил ичида тўлиқ ишга туширилади. Станциянинг умумий майдони 50 гектарга яқин. Тўлиқ ишга тушса, йилига 2,7–3 миллиард киловатт соат атрофида электр энергияси ишлаб чиқаради. Бу тахминан ўрта ҳисобда битта вилоятнинг учдан бир қисмини ток билан таъминлаб беради дегани, деди мутахассис.

Суҳбатда Отабек Омонов АЭС қурилиш ишларига маҳаллий корхоналар максимал даражада жалб қилинишини айтди.

АЭС бош пудратчиси Россиянинг “Росатом” тузилмасидаги “Атомстроекспорт” АЖ бўлади. Улар билан тузилган шартномада маҳаллийлаштириш пункти бор. Маҳаллий қурувчилар, машинасозлик саноатимиз, қурилиш материаллари ишлаб чиқариш саноатимизни АЭС қурилишига йўналтиришимиз керак. Қолаверса, ўзимизнинг кадрларни ҳам бу ишга жалб қиламиз. Ўзбекистонда кабел ишлаб чиқариш саноати яхши ривожланган. Маҳаллий кабел ишлаб чиқарувчиларни лойиҳамизга қўшишни режалаштирганмиз, деди дирексияси директори.

Маълум қилинишича, АЭС қурилишида иштирок этиш ёки маҳсулот етказишда қурувчилар ва қурилиш материаллари МАГАТЭ талабларига жавоб бериши керак. Улар чет эл компаниялари текширувидан ўтиб, махсус лицензия олгачгина тендерда қатнашади. Ғолиб бўлса, қурилишда иштирок этади ёки маҳсулотларни етказиб бериши мумкин бўлади.

АЭС қурилишига 5 минг киши жалб этилади. Жараёнга мингга яқин техника олиб келинади.