O‘zbekistonning Malayziyadagi elchisi Karomiddin Gadoyev FIVE Petroleum Malaysia kompaniyasi asoschisi va bosh direktori King Lim Chin Fui bilan uchrashuv o‘tkazdi. Bu haqda “Dunyo” agentligi xabar berdi.
Qayd etilishicha, muloqot chog‘ida Malayziya kompaniyasi rahbari bilan O‘zbekistonga investitsiya kiritish imkoniyatlari muhokama qilingan. King Lim may oyida Samarqandda bo‘lib o‘tgan biznes-forumda viloyat hokimligi bilan alyuminiy bankalar ishlab chiqarish loyihasi bo‘yicha erishilgan kelishuvni amalga oshirishdan manfaatdor ekanini maʼlum qilgan.
FIVE Petroleum Malaysia rahbari kompaniya tomonidan ishlab chiqarilishi rejalashtirilayotgan alyuminiy bankalarini yetkazib berishda mamlakatda faoliyat ko‘rsatayotgan salqin ichimliklar ishlab chiqarish korxonalari bilan hamkorlik o‘rnatishga tayyorligini bildirgan. Shuningdek, Malayziya tomoni bilan Toshkent shahri va keyinchalik respublikaning boshqa hududlarida yoqilg‘i quyish shoxobchalari tarmog‘ini yaratish va ularni zamonaviy uskunalar bilan jihozlash bo‘yicha loyihani ham amalga oshirish ishlarini boshlashga kelishib olingan.
FIVE Petroleum Malaysia kompaniyasiga 2020-yilda asos solingan. Kompaniya Malayziya bo‘ylab 110 dan ortiq avtomobillarga yoqilg‘i quyish shoxobchalarini boshqaradi. Shuningdek, 400 dan ortiq yoqilg‘i quyish shoxobchalariga ega BHPetrol kompaniyasining 60 foiz ulushiga egalik qiladi.
Avvalroq Xitoy kompaniyasi Farg‘onada yirik avtomobilsozlik majmuasini barpo etishi, O‘zbekistonda birinchi chiqindilarni yoqish zavodini qurish rejalashtirilayotgani to‘g‘risida xabar berilgandi.
Izoh (0)