“Ozsam, o‘zimga o‘xshamay qolardim”. Halima Ibragimova oshqozonini kestirganidan so‘ng ham 150 kilo vaznini saqlab qolgani haqida gapirdi

Komik aktrisa Halima Ibragimova bloger Ozod Xurramovga bergan intervyusida bugungi vazni va bir necha yil avval oshqozonini qisqartirish amaliyotini qildirishga majbur bo‘lgani haqida gapirdi.

— Hozirgi vaznim 150 kilogramm. O‘zimni yengil his qilaman, bundan hech qachon shikoyat qilmayman. Ammo karantindan avval ortiqcha vazn to‘plab, salomatligim biroz yomonlashgandi. Yaʼni oyog‘im og‘rib, o‘zimni yomon his qilganim uchun shifokorlar oshqozon qisqartirish operatsiyasini o‘tkazishni maslahat berishgan. Bolalikdan vaznim katta bo‘lgan, hatto bog‘cha yoshida ham do‘mboqqina qiz bo‘lganman. Ammo hech qachon vaznim salomatligimga yomon taʼsir etmagandi. Sog‘lig‘im birdan yomonlashgach, ortiqcha vazndan qutulishim kerak, deb operatsiyaga rozi bo‘ldim. Shifokorlar “Oshqozonning ko‘proq qismini olib tashlaylik, ozib, xushbichim bo‘lib qolasiz”, deyishdi. Ammo buni istamadim. Faqatgina oshqozonning 40 foizini olib tashlashlariga rozi bo‘ldim, xolos. Chunki men katta vazn tashlasam, Halimaga o‘xshamay qolardim. Tirikchilik nima kechadi, deb o‘ylagan bo‘lsam kerak. Ammo juda yaxshi tashladim. Adashmasam, o‘sha vaqtdagi vaznim 128 kilogramm bo‘lgandi. Ammo hammasi nafsga bog‘liq. Diyeta qilmasa, oshqozon kestirgan bilan baribir 2-3 yilda ortiqcha vazn to‘planadi. Mana, yo‘qotganlarimning o‘rni to‘ldi, — deydi aktrisa Halima Ibragimova.