Xalq ardog‘idagi aktrisa Muyassar Berdiqulova oshqozonni kichraytirish orqali 16 kilogrammga ozgani, operatsiyadan keyin ovqatlanish tartibi, bu holatga bildirilgan munosabatlar, hasad qiluvchi insonlar haqida gapirdi.
Muyassar Berdiqulova operatsiyadan so‘ng 16 kilogrammga ozgani va ovqatlanish tartibi haqida
“Qornim ochganda me’yorida ovqatlanaman. Shirinliklardan, xamirli ovqatlardan voz kechganman. Ba’zida shirinlik yegim kelsa, yeyman, lekin oldingidek mukkasidan ketib iste’mol qilmayman. Oldin va hozirgi holatning farqi bor. Ozgina, 2-3 qoshiq ovqatdan so‘ng qornim to‘yib qoladi. Oldin vaznim 85 kilogramm edi, hozir 69 kilogramm bo‘lganman. Bir yil bo‘ldi”, — deydi aktrisa.
Operatsiyadan keyin aktrisaga qanday fikrlar bildirildi?
“Yoshiga yarasha ish qilsa bo‘lmaydimi, deganlar ham bo‘ldi. Yoshimga hech narsa qilmagan, yashayapman. Nima qilibdi yoshimga? Har xil insonlar bor ekan. Men shunaqa insonman, tanqid qilishadimi, salbiy fikr bildirishadimi, hammasini eshitishim mumkin, lekin bularni ortga tashlab, yana yo‘limda davom etaman.
U narsani qilibdi, buni qilibdi deb urishib, yozishib yurmayman. Men o‘z yo‘limda ketaveraman, ular orqada qolaveradi.
Insonning qalbi toza bo‘lishi kerak, 40 yoshdan o‘tgandan keyin haqiqiy go‘zallik yuzaga chiqar ekan. U go‘zallik ichki go‘zallik bo‘ladi. Ichingiz go‘zal bo‘lsa, birovning muvaffaqiyatini ko‘rib qabul qila olsangiz, ichki go‘zallik tashqi tomonda ham namoyon bo‘ladi. Shu narsaga amin bo‘ldim, 40 yoshdan keyin insonning go‘zallashib ketgani bekorga emas.
Har qanday insonga ayta olaman, yuzimni operatsiya qildirganim yo‘q, Alloh bergan husnim, iste’dodim bordirki, insonlarga chiroyli bo‘lib ko‘rinarman. Balki chiroyli emasdirman”, — deydi Muyassar Berdiqulova.
Aktrisa hasad qiluvchi insonlarga munosabati haqida
“Shuning uchun o‘ylaymanki, qalb toza bo‘lishi kerak. Qalb go‘zal bo‘lsa, bu tashqi ko‘rinishga ham ta’sir qiladi. Baxil bo‘lib birovning yutug‘ini ko‘ra olmay, kechalari uxlamagan inson o‘zini yeydi va tobora xunuklashib boradi. Men baxillik qiladigan, ko‘ra olmaydigan, oldimda boshqa gapni aytib, ortimdan gapiradigan insonlarga e’tibor qilmayman. Mayli, hammasiga insof bersin, nima yaxshi niyati bo‘lsa erishsin, baxtli bo‘lib, boyib ketishsin, biz bilan ishi bo‘lmasin”, — deydi aktrisa.
Izoh (0)