Andijon viloyatida uchta isteʼmolchi 1 milliard 710 million so‘mlik elektr energiyasidan noqonuniy foydalangani aniqlandi. Bu haqda Energetika vazirligi huzuridagi “O‘zenergoinspeksiya” xabar berdi.
Qayd etilishicha, “O‘zenergoinspeksiya” tomonidan huquqni muhofaza qiluvchi organlar hamda elektr taʼminoti korxonalari xodimlari bilan hamkorlikda Andijon viloyatida o‘tkazilgan nazorat tadbirlarida elektr energiyasidan noqonuniy foydalanish holatlari aniqlanmoqda.
Xususan, Andijon shahrida faoliyat yuritib kelayotgan “Z.B.X.” MCHJga qarashli ishlab chiqarish sexida elektr hisoblagichga tashqi taʼsir ko‘rsatilib, jami 745,3 million so‘mlik elektr energiyasidan noqonuniy foydalangani aniqlangan.
Bu kabi holat Asaka tumanida joylashgan “Z.P.” MCHJga tegishli bolalar bog‘chasining elektr qurilmalari o‘zboshimchalik bilan tarmoqqa ulab, jami 502,5 million so‘mlik elektr energiyasidan noqonuniy foydalangani fosh etilgan.
Shuningdek, Andijon shahrida joylashgan “Bolalar bog‘i”ning elektr hisoblagichiga tashqi taʼsir ko‘rsatilib, jami 462,5 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan tegishli hujjatlar rasmiylashtirilib, huquqni muhofaza qiluvchi organlarga yuborilgan.
Avvalroq Toshkent va Namangan viloyatlarida elektrdan noqonuniy foydalanganlar 750 mln so‘mdan ziyod zarar yetkazgani, Farg‘onada 301 mln so‘mlik elektr energiyasidan noqonuniy foydalangan xususiy korxona aniqlangani to‘g‘risida xabar berilgandi.
Izoh (0)