Andijonning Marhamat hamda Xonobod tumanlarida elektr energiyasidan noqonuniy foydalangan shaxslar ushlandi. Bu haqda Bosh prokuratura matbuot xizmati xabar berdi.
Maʼlum qilinishicha, Marhamat tumanidagi “S.Q.I” MCHJ mansabdor shaxslariga qarashli bo‘lgan “T.Q.I.S”da o‘rnatilgan elektr hisoblagich ko‘rsatkichlarini o‘zgartirish maqsadida unga tashqi taʼsir o‘tkazib, elektr energiyasidan tijorat maqsadida noqonuniy foydalanib kelganligi oqibatida 569 mln 45 ming 961 so‘m zarar keltirgan.
Shuningdek, Xonobod tumanidagi “X.A.F” MCHJ mansabdor shaxslari va boshqalarga qarashli “S.V.K.M”ga o‘rnatilgan elektr hisoblagichni davlat muhrini buzib, unga tashqi taʼsir ko‘rsatib, tijorat maqsadida noqonuniy daromad orttirishni ko‘zlashib, elektr energiyasidan noqonuniy ravishda foydalanib kelganligi oqibatida 406 mln 567 ming 825 so‘m moddiy zarar yetkazgan.
Mazkur holatlar yuzasidan “S.Q.I”, “X.A.F” MCHJlar mansabdor shaxslari va boshqalarga nisbatan JKning 169-moddasi (o‘g‘rilik) 4-qismi “a” bandi bilan jinoyat ishi qo‘zg‘atilib, Sh.Q hamda A.M.larga nisbatan qamoqqa olish tarzidagi ehtiyot chorasi qo‘llanilgan.
Izoh (0)