Shveysariya NATOga a’zo bo‘lish shartini ma’lum qildi

Shveysariya agar mamlakat xavfsizligiga tahdid soluvchi vaziyat yuzaga kelsa, Yevropa Ittifoqi va NATOga qo‘shilish masalasini ko‘rib chiqishi mumkin. Bu haqda mamlakatning sobiq prezidenti Mishlin Kalmi-Rey Neue Zürcher Zeitung gazetasiga bergan intervyusida aytib o‘tdi.

Sobiq prezidentdan “Agar Shveysariya Yevropa Ittifoqi bilan yangi ikki tomonlama shartnoma tuzmasa, bu dramatik vaziyat bo‘lmaydimi?” deb so‘rashdi.

Bunga siyosatchi har doim ikki tomonlama munosabatlarning kuchli tarafdori bo‘lib kelganini, “lekin fuqarolarni ishontirish tobora qiyinlashib borayotgani”ni aytib o‘tdi.

Mishelning so‘zlariga ko‘ra, qo‘shni mamlakatlardagi fermerlarning noroziliklari ko‘pchilik shveysariyaliklarni Yevropa Ittifoqiga a’zolikning salbiy tomonlari haqida o‘ylashga majbur qilgan. Biroq sobiq prezidentning fikricha, Shveysariya muayyan vaziyatda nafaqat YIga, balki NATOga ham kirishi mumkin.

“Men uchun izolyatsiya variant emas. Ayniqsa, betaraflik bizning xavfsizligimizni kafolatlamasa, bu salbiy oqibatlarga olib keladi. YI va NATOga kirish haqida jiddiy o‘ylashimizga to‘g‘ri keladi”, — dedi u.

Shveysariya hozirda Yevropa Ittifoqi yoki NATO a’zosi emas va haligacha o‘zini betaraf mamlakat sifatida e’tirof etadi. Biroq Bern Rossiyaga qarshi sanksiyalarga qo‘shildi va mamlakat harbiylari NATO mashg‘ulotlarida faol ishtirok etmoqda.