“Barselona” bosh murabbiyi Xans-Diter Flik yozgi transfer oynasida jamoaning hujum chizig‘ini kuchaytirishga qaror qildi. Bu haqda “Sport.es” jurnalisti Ivan San Antonio xabar bermoqda.
Manbaga ko‘ra, germaniyalik mutaxassis “Atletik” va Ispaniya terma jamoasi vingeri Niko Uilyamsning transfer qilinishini xohlaydi, biroq bu kelishuv Kataloniya jamoasi uchun qiyinchilik tug‘dirishi mumkin. Flikning ikkinchi “nishoni” Ispaniya terma jamoasining yana bir o‘yinchisi, “RB Leypsig”ning ko‘p qirrali hujumkor yarim himoyachisi, Kataloniya jamoasi tarbiyalanuvchisi Daniel Olmo hisoblanadi. Qayd etilishicha, germaniyalik mutaxassis Olmodan qanday foydalanishni biladi, uning jamoaga qo‘shilishi jamoa o‘yiniga shijoat qo‘sha oladi.
Eslatib o‘tamiz, o‘tgan mavsum Olmo barcha turnirlarda 26 ta o‘yinda ishtirok etib, sakkizta gol va beshta golli uzatmaga mualliflik qilgan. Futbolchining klub bilan amaldagi mehnat shartnomasi 2027-yilning yoziga qadar amal qiladi. Transfermarkt portalida berilgan ma’lumotlarga ko‘ra, futbolchining bozor qiymati 50 million yevroni tashkil qiladi.
Niko Uilyams o‘tgan mavsumda 39 ta o‘yinda maydonga tushib, 8 ta gol urdi va 19 ta golli uzatmani amalga oshirdi. Futbolchining transfermarkt internet portalidagi taxminiy bahosi 60 million yevroni tashkil etadi, Nikoning bask klubi bilan shartnomasi 2027-yilning yoziga qadar amal qiladi.
Izoh (0)