“Barselona” asosiy jamoaning to‘qqiz nafar futbolchisini yangi mavsum uchun ro‘yxatdan o‘tkaza olmadi

“Barselona” La Liganing keyingi mavsumi uchun asosiy jamoaning 9 nafar futbolchisini ro‘yxatdan o‘tkaza olmadi. Bu haqda Daily Mail xabar bermoqda.

Manbaga ko‘ra, so‘nggi bir yil ichida maosh uchun beriladigan fond miqdorining ikki baravar kamaygani klubga futbolchilarni ro‘yxatdan o'tkazish bilan bog‘liq muammoni hal qilishga yo‘l qo‘yib bermagan.

Avvalroq kataloniyaliklar klubning yangi bosh murabbiyi Xans-Diter Flik va uning murabbiylar shtabini ro‘yxatdan o‘tkazishda qiynalayotgani haqida xabar berilgandi. Sabablar o‘xshash: klub mutaxassis va uning jamoasini ro‘yxatdan o‘tkazish uchun sarflanayotgan pullarni kamaytirishi yoki qo‘shimcha mablag‘ ishlab topishi kerak.

Ma’lumot uchun, “Barselona” 2023—2024-yilgi mavsumda Ispaniya chempionatida ikkinchi o‘rinni egalladi. Jamoa mavsumning 38 uchrashuvida 85 ochko jamg‘ardi.