“Estoniya o‘z qo‘shinlarini Ukrainaga yuborishni muhokama qilishga tayyor” — elchi Anneli Kolk

Estoniya Ukrainaga o‘z qo‘shinlarini yuborishni muhokama qilishga tayyor. Bu haqda Estoniyaning Ukrainadagi elchisi Anneli Kolk “RBK-Ukraina”ga bergan intervyusida aytib o‘tdi.

“Biz buni muhokama qilishga tayyormiz. Biz uchun bu qizil chiziq emas. Biz NATO yoki Yevropa Ittifoqining umumiy pozitsiyaga erishishiga umid qilamiz. Bizning rahbarlarimiz, ayniqsa, Mudofaa vazirligi, bu masalani muhokama qilmoqdalar. Ular biz uchun imkonsiz narsa yo‘qligini aytishdi”, — dedi Kolk.

Shuningdek, u Estoniya o‘z hududida ukrainalik instruktorlarni tayyorlaganini ham eslab o‘tdi.

Estoniya Ukrainaga mamlakat yalpi ichki mahsulotiga nisbatan yordam ko‘rsatish bo‘yicha dunyoda birinchi o‘rinda turadi.

Avvalroq Estoniya prezidentining milliy xavfsizlik bo‘yicha maslahatchisi Madis Roll mamlakat hukumati Ukraina g‘arbiga qo‘shin yuborish imkoniyatini “jiddiy” muhokama qilayotganini ma’lum qilgandi.

Uning so‘zlariga ko‘ra, hozirda ijroiya hokimiyati bu masalani ko‘rib chiqmoqda. Elchining ta’kidlashicha, estoniyalik harbiylar NATOning kichikroq koalitsiyasi bir qismi sifatida harakat qilishi mumkin.