Эстония Украинага ўз қўшинларини юборишни муҳокама қилишга тайёр. Бу ҳақда Эстониянинг Украинадаги элчиси Аннели Колк “РБК-Украина”га берган интервьюсида айтиб ўтди.
“Биз буни муҳокама қилишга тайёрмиз. Биз учун бу қизил чизиқ эмас. Биз НАТО ёки Европа Иттифоқининг умумий позицияга эришишига умид қиламиз. Бизнинг раҳбарларимиз, айниқса, Мудофаа вазирлиги, бу масалани муҳокама қилмоқдалар. Улар биз учун имконсиз нарса йўқлигини айтишди”, — деди Колк.
Шунингдек, у Эстония ўз ҳудудида украиналик инструкторларни тайёрлаганини ҳам эслаб ўтди.
Эстония Украинага мамлакат ялпи ички маҳсулотига нисбатан ёрдам кўрсатиш бўйича дунёда биринчи ўринда туради.
Аввалроқ Эстония президентининг миллий хавфсизлик бўйича маслаҳатчиси Мадис Ролл мамлакат ҳукумати Украина ғарбига қўшин юбориш имкониятини “жиддий” муҳокама қилаётганини маълум қилганди.
Унинг сўзларига кўра, ҳозирда ижроия ҳокимияти бу масалани кўриб чиқмоқда. Элчининг таъкидлашича, эстониялик ҳарбийлар НАТОнинг кичикроқ коалицияси бир қисми сифатида ҳаракат қилиши мумкин.
Изоҳ (0)