Turli guruhlardan iborat qurolli to‘dalar so‘nggi ikki oy ichida G‘azo sektoridagi banklardan 120 million dollarga yaqin naqd pul o‘g‘irlagan. Bu haqda Financial Times nashri xabar bermoqda.
Nashrning ma’lum qilishicha, BMT hisob-kitoblariga ko‘ra, qisman HAMAS tomonidan qo‘llab-quvvatlangan to‘dalar G‘azo shimolida joylashgan bank kassalaridan naqd pulning kamida uchdan bir qismini o‘g‘irlagan. Qayd etilishicha, banklar o‘g‘rilikning oldini olish uchun alohida seyflarni beton konstruksiyalar bilan o‘rab chiqib, qariyb 240 million dollarni saqlab qolishga muvaffaq bo‘lgan.
Eng yirik bank o‘g‘irliklari 17 va 18-aprel kunlari sodir bo‘lgan. Bundan sal oldin Falastin banki filiallaridan birining pullarni saqlash xonasiga beton quyib chiqqandi. Biroq voqea guvohining so‘zlariga ko‘ra, jinoiy guruh uni 17-aprel kuni portlatib, o‘sha kuni 31 million dollarni o‘g‘irlagan. 18-aprel kuni qurolli guruhlar taxminan 36 million dollarlik ikkinchi yirik o‘g‘rilikni amalga oshirib, pullar “G‘azodagi oliy hokimiyat buyrug‘i bilan musodara qilingan” deb da’vo qilishgan.
O‘g‘riliklar fonida Isroil rasmiylari o‘g‘irlangan mablag‘larning bir qismidan HAMAS jangchilari yashirin kurash olib borish uchun foydalanishi mumkinligidan xavotir bildirdi, deb ta’kidlaydi Financial Times.
Gazetaning eslatishicha, Isroil avvalroq G‘azo sektoriga naqd pul olib kirishga cheklovlar qo‘ygan, bu esa tanqislikka olib kelgandi. Aytilishicha, mahalliy aholi G‘azo sektorining markaziy qismida bankomatdan foydalanish uchun pul to‘lashi kerak, bu yerda faqat bir nechta ishlaydigan bankomatlar qolgan.
Izoh (0)