O‘zbekiston va Janubiy Koreya prezidentlari Samarqandning tarixiy obidalariga tashrif buyurdi (foto)

Koreya prezidenti Yun Sok Yol davlat tashrifi doirasidagi tadbirlar yakunida O‘zbekiston prezidenti Shavkat Mirziyoyev hamrohligida Samarqandning tarixiy obidalari bilan tanishdi. Bu haqda prezident matbuot xizmati xabar berdi.

Ko‘hna shaharda davlat rahbarlari rafiqalari bilan dunyoga mashhur Registon maydoniga tashrif buyurgan. Oliy martabali mehmonlar Registondagi har bir obida, milliy hunarmandchilik mahsulotlari ko‘rgazmalarini hayrat bilan tomosha qilgan. Ularga madrasalarning qurilish tarixi, peshtoqlaridagi naqsh va ramzlarning mazmuni haqida so‘zlab berilgan.

Amir Temur maqbarasi ziyorati chog‘ida mehmonlarga buyuk bobomizning davlatchilik siyosati, harbiy mahorati, turli mamlakatlar bilan diplomatik aloqalari haqida ma’lumot berilgan. Shundan so‘ng prezidentlar va ularning rafiqalari “Afrosiyob” muzeyiga tashrif buyurgan.

Bu muzey Samarqand shahrining uch ming yillik tarixidan hikoya qiladi. Bu yerdagi noyob eksponat va devoriy suratlar butun dunyo sayyohlarini, shu jumladan koreyaliklarni o‘ziga jalb etib keladi. VII asrga oid devoriy suratlardan birida Samarqand hukmdorining qadimgi Koreya – Koguryo elchilarini qabul qilish marosimi ham aks etgan. Bu xalqlar o‘rtasidagi almashinuvlarning ko‘p asrlik tarixidan dalolat beradi.

Yaqinda koreyalik mutaxassislar ishtirokida muzeyni restavratsiya qilish ishlari yakunlangan, binoning ichki va tashqi qiyofasi mukammal qilib yangilangan.

Janubiy Koreya prezidenti tarixiy ashyolarni hayrat va eʼtibor bilan tomosha qilar ekan, xalqlarimiz o‘rtasidagi aloqalari uzoq o‘tmishga borib taqalishini, bu do‘stlik va hamkorlik bundan keyin ham bardavom bo‘lishini taʼkidlagan.

Yetakchilar madaniy merosni asrash borasidagi ikki tomonlama hamkorlikni yanada rivojlantirish muhimligini qayd etgan.

So‘ng oliy martabali mehmonlar Mirzo Ulug‘bek rasadxonasi va muzeyida bo‘lgan. Amir Temurning suyukli nabirasi bo‘lgan Muhammad Tarag‘ay Mirzo Ulug‘bek buyuk astronom olim va hukmdor sifatida ilm-fan va madaniyat rivojiga katta hissa qo‘shgan. O‘rta asrlardayoq noyob rasadxona kashf qilib, osmon jismlarini juda aniq o‘rgangan. Uning “Ziji jadidi Ko‘ragoniy” asari dunyo astronomiyasida muhim qo‘llanma bo‘lib xizmat qilgan.

Ekskursiyaning oxirgi manzili “Buyuk ipak yo‘li” xalqaro turizm markazidagi “Boqiy shahar” tarixiy-etnografik majmuasi bo‘lgan. Bu yerda mehmonlarga xalqimizning betakror badiiy, hunarmandlik va musiqiy madaniyati namoyish etilgan.

Davlat rahbarlarining Samarqanddagi uchrashuvi samimiy va do‘stona muhitda o‘tgan.