Ўзбекистон ва Жанубий Корея президентлари Самарқанднинг тарихий обидаларига ташриф буюрди (фото)

Корея президенти Юн Сок Ёл давлат ташрифи доирасидаги тадбирлар якунида Ўзбекистон президенти Шавкат Мирзиёев ҳамроҳлигида Самарқанднинг тарихий обидалари билан танишди. Бу ҳақда президент матбуот хизмати хабар берди.

Кўҳна шаҳарда давлат раҳбарлари рафиқалари билан дунёга машҳур Регистон майдонига ташриф буюрган. Олий мартабали меҳмонлар Регистондаги ҳар бир обида, миллий ҳунармандчилик маҳсулотлари кўргазмаларини ҳайрат билан томоша қилган. Уларга мадрасаларнинг қурилиш тарихи, пештоқларидаги нақш ва рамзларнинг мазмуни ҳақида сўзлаб берилган.

Амир Темур мақбараси зиёрати чоғида меҳмонларга буюк бобомизнинг давлатчилик сиёсати, ҳарбий маҳорати, турли мамлакатлар билан дипломатик алоқалари ҳақида маълумот берилган. Шундан сўнг президентлар ва уларнинг рафиқалари “Афросиёб” музейига ташриф буюрган.

Бу музей Самарқанд шаҳрининг уч минг йиллик тарихидан ҳикоя қилади. Бу ердаги ноёб экспонат ва деворий суратлар бутун дунё сайёҳларини, шу жумладан кореяликларни ўзига жалб этиб келади. VII асрга оид деворий суратлардан бирида Самарқанд ҳукмдорининг қадимги Корея – Когурё элчиларини қабул қилиш маросими ҳам акс этган. Бу халқлар ўртасидаги алмашинувларнинг кўп асрлик тарихидан далолат беради.

Яқинда кореялик мутахассислар иштирокида музейни реставрация қилиш ишлари якунланган, бинонинг ички ва ташқи қиёфаси мукаммал қилиб янгиланган.

Жанубий Корея президенти тарихий ашёларни ҳайрат ва эътибор билан томоша қилар экан, халқларимиз ўртасидаги алоқалари узоқ ўтмишга бориб тақалишини, бу дўстлик ва ҳамкорлик бундан кейин ҳам бардавом бўлишини таъкидлаган.

Етакчилар маданий меросни асраш борасидаги икки томонлама ҳамкорликни янада ривожлантириш муҳимлигини қайд этган.

Сўнг олий мартабали меҳмонлар Мирзо Улуғбек расадхонаси ва музейида бўлган. Амир Темурнинг суюкли набираси бўлган Муҳаммад Тарағай Мирзо Улуғбек буюк астроном олим ва ҳукмдор сифатида илм-фан ва маданият ривожига катта ҳисса қўшган. Ўрта асрлардаёқ ноёб расадхона кашф қилиб, осмон жисмларини жуда аниқ ўрганган. Унинг “Зижи жадиди Кўрагоний” асари дунё астрономиясида муҳим қўлланма бўлиб хизмат қилган.

Экскурсиянинг охирги манзили “Буюк ипак йўли” халқаро туризм марказидаги “Боқий шаҳар” тарихий-этнографик мажмуаси бўлган. Бу ерда меҳмонларга халқимизнинг бетакрор бадиий, ҳунармандлик ва мусиқий маданияти намойиш этилган.

Давлат раҳбарларининг Самарқанддаги учрашуви самимий ва дўстона муҳитда ўтган.