Qozog‘istondan shakar eksportiga vaqtinchalik taqiq joriy etildi. Tegishli buyruqni qishloq xo‘jaligi vaziri Aydarbek Saparov imzoladi. Bu haqda Tengrinews xabar berdi.
Qozog‘iston qishloq xo‘jaligi vazirining 2024-yil 11-iyundagi “Qand eksportining ayrim masalalari to‘g‘risida”gi 196-son buyrug‘i bilan 2024-yil 31-avgustgacha shakarni mamlakat hududidan, jumladan, Yevrosiyo iqtisodiy ittifoqiga aʼzo davlatlarga ham olib chiqish vaqtinchalik taqiqlandi, — deyiladi xabarda.
Buyruq 2024-yil 14-iyundan kuchga kirgan. Shakar eksportiga nisbatan vaqtinchalik cheklov choralarini belgilash to‘g‘risidagi qaror tashqi savdo siyosati va xalqaro iqtisodiy tashkilotlarda ishtirok etish bo‘yicha idoralararo komissiya tomonidan 2024-yil 6-mayda qabul qilingan.
Taqiqqa nima sabab bo‘ldi?
Boshqarma ma’lumotlariga ko‘ra, yozda ichki bozorda shakar iste’moli ham aholi, ham sanoat iste’molchilari tomonidan oshadi. Ichki bozorni ta’minlash va shakarning reeksportiga yo‘l qo‘ymaslik maqsadida mahsulot eksportiga vaqtinchalik taqiq joriy etildi.
Ayni paytda Qozog‘istonda mavjud shakar zaxirasi qand lavlagining yangi hosili kelguniga qadar talabni qondirish uchun yetarli. Mahalliy zavodlar shakar ishlab chiqarish uchun uchinchi mamlakatlardan shakarqamish olib keladi. Vazirlik sanoatda qayta ishlash uchun shakar xomashyosini bojsiz olib kirish uchun arizalarni qabul qilishni davom ettirmoqda.
O‘zbekistonda shakar narxi oshadimi?
O‘zbekistonda shakar narxini barqaror saqlash bo‘yicha zarur chora-tadbirlar ishlab chiqilgan bo‘lib, narxlar keskin o‘sishi bo‘yicha xavotirga o‘rin yo‘q, deydi Raqobatni rivojlantirish va iste’molchilar huquqlarini himoya qilish qo‘mitasi raisi maslahatchisi Otabek Usmonov.
U ichki bozorda ijtimoiy ahamiyatga ega mahsulotlar, xususan, shakar mahsuloti realizatsiyasi doimiy tahlil qilib borilishini ta’kidladi. 2024-yil 16-apreldan mahalliy ishlab chiqaruvchilar tomonidan birja savdolariga qo‘yiladigan shakar mahsulotining kunlik hajmi 20 foizga (2 100 tonnadan 2 500 tonnaga) oshirilib, boshlang‘ich narxi 6 foizga (13 600 so‘mdan 12 860 so‘mga) pasaytirilgan.
Shakar mahsulotining birja savdolaridagi narxi o‘tgan yilning mos davriga nisbatan 4 foizga pasaygan bo‘lsa, bozorlardagi chakana narx o‘zgarishsiz qolgan.
Narxlarni barqaror saqlash bo‘yicha zarur chora-tadbirlar ishlab chiqilgan bo‘lib, narxlar keskin o‘sishi bo‘yicha xavotirga o‘rin yo‘q. Shu sababli internet tarmoqlarida tarqatilayotgan to‘liq o‘rganilmagan xabarlarga asosan xavotirga tushmasligingizni so‘rab qolamiz, — deya xulosa qildi Otabek Usmonov.
Izoh (0)