Қозоғистондан шакар экспортига вақтинчалик тақиқ жорий этилди. Тегишли буйруқни қишлоқ хўжалиги вазири Айдарбек Сапаров имзолади. Бу ҳақда Tengrinews хабар берди.
Қозоғистон қишлоқ хўжалиги вазирининг 2024 йил 11 июндаги “Қанд экспортининг айрим масалалари тўғрисида”ги 196-сон буйруғи билан 2024 йил 31 августгача шакарни мамлакат ҳудудидан, жумладан, Евросиё иқтисодий иттифоқига аъзо давлатларга ҳам олиб чиқиш вақтинчалик тақиқланди, — дейилади хабарда.
Буйруқ 2024 йил 14 июндан кучга кирган. Шакар экспортига нисбатан вақтинчалик чеклов чораларини белгилаш тўғрисидаги қарор ташқи савдо сиёсати ва халқаро иқтисодий ташкилотларда иштирок этиш бўйича идоралараро комиссия томонидан 2024 йил 6 майда қабул қилинган.
Тақиққа нима сабаб бўлди?
Бошқарма маълумотларига кўра, ёзда ички бозорда шакар истеъмоли ҳам аҳоли, ҳам саноат истеъмолчилари томонидан ошади. Ички бозорни таъминлаш ва шакарнинг реекспортига йўл қўймаслик мақсадида маҳсулот экспортига вақтинчалик тақиқ жорий этилди.
Айни пайтда Қозоғистонда мавжуд шакар захираси қанд лавлагининг янги ҳосили келгунига қадар талабни қондириш учун етарли. Маҳаллий заводлар шакар ишлаб чиқариш учун учинчи мамлакатлардан шакарқамиш олиб келади. Вазирлик саноатда қайта ишлаш учун шакар хом ашёсини божсиз олиб кириш учун аризаларни қабул қилишни давом эттирмоқда.
Ўзбекистонда шакар нархи ошадими?
Ўзбекистонда шакар нархини барқарор сақлаш бўйича зарур чора-тадбирлар ишлаб чиқилган бўлиб, нархлар кескин ўсиши бўйича хавотирга ўрин йўқ, дейди Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси маслаҳатчиси Отабек Усмонов.
У ички бозорда ижтимоий аҳамиятга эга маҳсулотлар, хусусан, шакар маҳсулоти реализацияси доимий таҳлил қилиб борилишини таъкидлади. 2024 йил 16 апрелдан маҳаллий ишлаб чиқарувчилар томонидан биржа савдоларига қўйиладиган шакар маҳсулотининг кунлик ҳажми 20 фоизга (2 100 тоннадан 2 500 тоннага) оширилиб, бошланғич нархи 6 фоизга (13 600 сўмдан 12 860 сўмга) пасайтирилган.
Шакар маҳсулотининг биржа савдоларидаги нархи ўтган йилнинг мос даврига нисбатан 4 фоизга пасайган бўлса, бозорлардаги чакана нарх ўзгаришсиз қолган.
Нархларни барқарор сақлаш бўйича зарур чора-тадбирлар ишлаб чиқилган бўлиб, нархлар кескин ўсиши бўйича хавотирга ўрин йўқ. Шу сабабли интернет тармоқларида тарқатилаётган тўлиқ ўрганилмаган хабарларга асосан хавотирга тушмаслигингизни сўраб қоламиз, — дея хулоса қилди Отабек Усмонов.
Изоҳ (0)