Yaman husiylari 12-iyun kuni Isroilning Ashdod va Hayfa shaharlariga havodan hujum uyushtirgan. Bu haqda Al Arabiya nashri xabar berdi.
Manbada keltirilishicha, husiylar hujumiga Iroqdagi “Islomiy qarshilik harakati” ham qo‘shilgan. Ikki guruh Ashdod va Hayfa shaharlaridagi strategik nuqtalarga hujum uyushtirgan.
Isroil rasmiylari hujum oqibatida yetkazilgan zarar ko‘lami haqida maʼlumot taqdim etmagan. Halok bo‘lgan va yaralangan fuqarolar haqida ham maʼlumot mavjud emas.
Husiylar, shuningdek, Qizil dengizda turgan Isroil harbiy tashuvchisiga ham raketalar otgan. “Ansorulloh” harakati matbuot kotibi Yahyo Sari ushbu xabarni tasdiqlagan.
Kema hujumdan keyin jiddiy shikastlanib, cho‘kish arafasida ekani maʼlum qilingan. Husiylar kemaga hujumda uchuvchisiz qurilmalar, havo dronlari va ballistik raketalardan foydalangani aytilgan.
Hujumga uchragan kema Yamanning Hudayda portidan 68 kilometr janubi-g‘arbda to‘xtab qolgan. Undagi ekipaj tezda evakuatsiya qilingan.
Izoh (0)