Turkiya va Pokiston joriy haftada O‘rta Yer dengizining sharqiy qismida hamkorlikdagi harbiy mashg‘ulotlar o‘tkazdi. Bu haqda Anadolu nashri xabar berdi.
Turkiya va Pokiston harbiy-dengiz kuchlari joriy haftada Sharqiy O‘rta Yer dengizida operativ tayyorgarlikni kuchaytirish va hamkorlikni rivojlantirish maqsadida qo‘shma mashg‘ulotlar amalga oshirgan. Harbiy mashqlar “Turgutreis-9” deb nomlangan.
“O‘quv mashg‘ulotlari Sharqiy O‘rta yer dengizida TCG Heybeliada korveti, TCG Doganay suvosti kemasi va Pokiston harbiy-dengiz kuchlarining PNS Bobur korveti ishtirokida o‘tkazildi”, — deyilgan Turkiya Milliy Mudofaa vazirligi bayonotida.
Pokiston harbiy-dengiz kuchlari bayonotida aytilishicha, dushanba va seshanba kunlari Goljuk harbiy-dengiz bazasida o‘tkazilgan mashg‘ulotlar PNS Bobur ekipajini turli dengiz amaliyotlarini o‘tkazishga o‘rganishdan iborat bo‘lgan. Shuningdek, Pokiston va Turkiya tomoni o‘zaro hamkorlikni kuchaytirish va ikki dengiz floti o‘rtasidagi ikki tomonlama munosabatlarni yanada mustahkamlash borasida uchrashuvlar tashkil etgan.
PNS Bobur korveti Pokiston dengiz kuchlarining eng so‘nggi va zamonaviy vositalaridan biri hisoblanadi. Ushbu korvet Milgem tipidagi kema bo‘lib, hozirda u Osiyoda faqat Istanbul dengiz floti zavodida hamda Karachidagi muhandislik zavodida ishlab chiqarilmoqda.
Izoh (0)