Украина раҳбари Владимир Зеленский 12 июнь куни Саудия Арабистонининг Жидда шаҳрида мамлакат тахт вориси билан учрашган. Бу ҳақда Al Arabiya нашри хабар берди.
Манбада айтилишича, чоршанба куни Зеленский Жиддага эълон қилинмаган ташриф билан келган. Президентни Саудия шаҳзодаси Муҳаммад бин Салмон шахсан кутиб олган.
Украина президентини кутиб олиш тадбирида кўплаб Саудия ҳукумати расмийлари, мамлакатнинг миллий хавфсизлик бўйича маслаҳатчиси ва вазирликлар ходимлари иштирок этган. Аэропортда кутиб олинган Зеленский ёпиқ музокара учун қироллик саройига олиб кетилган.
Зеленскийнинг Саудия Арабистонига боришдан мақсади ва дастури ҳақида маълумот мавжуд эмас. Икки томон музокаралар асосан ёпиқ кўринишда кечиши хабар қилинган.
Саудия Арабистони Россия ва Украина ўртасидаги муносабатларда ўзини потенциал воситачи сифатида кўрсатиб келади. Ҳозирга қадар Киев бир неча бор Москва билан музокараларда воситачилик қилишни Ар-Риёддаги ҳукуматдан сўрагани ҳам маълум.
Ўтган йилнинг август ойида Саудия Арабистони уруш бўйича музокаралар амалга ошириш учун конференция ўтказган эди. Унда 40 дан ортиқ давлат иштирок этган. Москва конференцияда қатнашишдан бош тортган.
Президент Зеленский охирги марта жорий йилнинг февраль ойида Саудия Арабистонига ташриф буюрган эди. У Саудия Арабистони валиаҳд шаҳзодаси Муҳаммад бин Салмон билан ўзининг тинчлик режасини илгари суриш ва потенциал ҳарбий асирлар алмашинувини муҳокама қилиш учун музокаралар ўтказган.
Изоҳ (0)