Yurakning sababsiz kuchli ura boshlashi eng xotirjam odamda ham vahima uyg‘otishi mumkin. Sog‘lig‘ingizdan behuda xavotirga tushmaslik uchun buning sababini aniqlash lozim. Avvalo, organizm berayotgan signallarga quloq tuting: yurakning tez urishi ba’zi holatlarda xavfsiz bo‘lib, ma’lum vaqtdan so‘ng tabiiy ravishda o‘tib ketadi.
Nima uchun yurak ba’zan tez ura boshlaydi?
Oddiy yurak urishi normada insonga sezilmaydi. Bu vaqtda biz yuragimiz qanday ishlayotganiga ahamiyat bermaymiz. Yurak ritmi o‘zgarishi va tezlashishi bilanoq unga ahamiyat beramiz va tashvishga tushamiz. Bunday holatning bir necha sabablari bor. Ular ichki va tashqi omillardan iborat. Tashqi omillarga:
- Qo‘rquv hissi;
- Cho‘chib ketish;
- Stress;
- Jismoniy faoliyat;
- Kofein moddasini o‘z ichiga olgan ichimliklar: qahva, energetiklar iste’moli;
- Spirtli ichimliklarga ruju qo‘yish kabilar kiradi.
Qayd etilgan sabablarning barchasi qonda adrenalin keskin o‘sishiga olib keladi. Bu esa yurak urish tezligini oshirib yuboradi. Tashqi omillar yurakka vaqtinchalik salbiy ta’sir o‘tkazadi va stressli vaziyat yo‘qolgach, yurak yana o‘z holida ura boshlaydi.
Yurak urish tezligining oshishi ichki omillarga ham bog‘liq. Ya’ni yurak faoliyati bilan bog‘liq kasalliklar yoki gormonal buzilishlar bevosita yurak ritmiga ta’sir ko‘rsatadi. Bunday vaziyatda yurakda patologiyani aniqlash uchun kardiolog ko‘rigidan o‘tish va boshqa tor yo‘nalish mutaxassislaridan maslahat olish lozim.
Yurak tez urganda nima qilish kerak?
Yurakdagi yengil taxikardiyani uy sharoitida bartaraf etishning oddiy usullari mavjud.
Muhim: tavsiyalar yurak tez urishi faqat tashqi omil sababli yuzaga kelganda yordam beradi.
- Buning uchun chuqur nafas olish mashqidan foydalanishingiz mumkin. Avvalo, qulay o‘tirib oling, so‘ng chuqur va sekin nafas oling va nafasni 10 soniya ushlab turing. Nafas chiqaring. Bunday mashqni yurak pulsi normal holatga kelguncha takrorlash kerak (odatda 5-10 marta bajarilganda yordam beradi).
- Noqulay va tor kiyimlarni yeching yoki bo‘shashtiring.
- Jimjiloq barmoqni yengil massaj qiling. Kichkina barmoqning tirnoq sohasini taxminan 60 marta bosish kerak. Mashqni ikkala qo‘lda takrorlash mumkin.
- Yarim stakan suv iching. Suvni asta-sekin, shoshilmay va o‘tirgan holatda ichish kerak.
Agar sizda taxikardiya holatlari tez-tez takrorlanib tursa, shifokor ko‘rigidan o‘tishni kechiktirmang. Salomatligingizga e’tiborli bo‘ling!
Izoh (0)