So‘nggi vaqtlarda biz zamonaviy texnologiyalar namunasi — turli robotlarning ko‘plab imkoniyatlaridan boxabar bo‘ldik.
Masalan, dengiz va okeanlar tubining geologik tuzilishi hamda undagi jonzotlarni videotasvirga oladigan pingvin-robot, arab va ingliz tillarida so‘zlashadigan va sun’iy intellektga ega ayol-robot, zefir qovurishni, kiyimlarni taxlab qo‘yishni va gullarni sug‘orishni biladigan MagicBot shular jumlasidandir.
Endi esa Xitoydagi yana bir robot-gumanoid — XBot-L bilan tanishing. U Buyuk Xitoy devori bo‘ylab yurgan dunyodagi birinchi robot hisoblanadi.
XBot-L robot Xitoy devori yo‘llaridan: baland va pastlik, tekis bo‘lmagan sirt bo‘ylab bemalol harakatlana oladi. U chuqurliklar va bo‘rtiqlardan qoqilib ketmaydi, shuningdek, zinapoyalardan ham ko‘tarila oladi. Shuningdek, gumanoid devorning past va tor yo‘laklaridan engashib o‘ta oladi. Robot Era ma’lumotlariga ko‘ra, boshqa robotlar bunday vazifani bajara olmaydi. Qiziqarlisi, XBot-L butunlay qorong‘i joyda ham qiynalmay harakatlanishi mumkin.
Bunday ajoyib koordinatsiyaga kelishiga RL deb nomlangan patentlangan texnologiya sababchidir.
“Perceptual RL algoritmlari robotning notanish relyefga duch kelganida idrok etish va qaror qabul qilish qobiliyatini kuchaytirishga yordam beradi”, — deydi Robot Era asoschilaridan biri Yue Si.
New Atlas jurnalistlari savol bilan murojaat etishdi: “Robot-gumanoid uchun kirish bepulmi?”
Odatda Buyuk Xitoy devori sayyohlar bilan to‘la bo‘lsada, videoda robot yolg‘iz tasvirlangan. U yerga kirish 45 yuan (6,5 dollar) turadi. Mutaxassislar robotlarning jamoat joylariga tashrif buyurishlari uchun to‘lov jotriy qilishni taklif qilmoqda.
Masalan, biror kishi gumanoid bilan avtobusga chiqsa, o‘zi uchun ham, robot uchun ham bir xil pul to‘lashi lozim, chunki gumanoid real odam kabi joy egallaydi.
Izoh (0)