Юракнинг сабабсиз кучли ура бошлаши энг хотиржам одамда ҳам ваҳима уйғотиши мумкин. Соғлиғингиздан беҳуда хавотирга тушмаслик учун бунинг сабабини аниқлаш лозим. Аввало, организм бераётган сигналларга қулоқ тутинг: юракнинг тез уриши баъзи ҳолатларда хавфсиз бўлиб, маълум вақтдан сўнг табиий равишда ўтиб кетади.
Нима учун юрак баъзан тез ура бошлайди?
Оддий юрак уриши нормада инсонга сезилмайди. Бу вақтда биз юрагимиз қандай ишлаётганига аҳамият бермаймиз. Юрак ритми ўзгариши ва тезлашиши биланоқ унга аҳамият берамиз ва ташвишга тушамиз. Бундай ҳолатнинг бир неча сабаблари бор. Улар ички ва ташқи омиллардан иборат. Ташқи омилларга:
- Қўрқув ҳисси;
- Чўчиб кетиш;
- Стресс;
- Жисмоний фаолият;
- Кофеин моддасини ўз ичига олган ичимликлар: қаҳва, энергетиклар истеъмоли;
- Спиртли ичимликларга ружу қўйиш кабилар киради.
Қайд этилган сабабларнинг барчаси қонда адреналин кескин ўсишига олиб келади. Бу эса юрак уриш тезлигини ошириб юборади. Ташқи омиллар юракка вақтинчалик салбий таъсир ўтказади ва стрессли вазият йўқолгач, юрак яна ўз ҳолида ура бошлайди.
Юрак уриш тезлигининг ошиши ички омилларга ҳам боғлиқ. Яъни юрак фаолияти билан боғлиқ касалликлар ёки гормонал бузилишлар бевосита юрак ритмига таъсир кўрсатади. Бундай вазиятда юракда патологияни аниқлаш учун кардиолог кўригидан ўтиш ва бошқа тор йўналиш мутахассисларидан маслаҳат олиш лозим.
Юрак тез урганда нима қилиш керак?
Юракдаги енгил тахикардияни уй шароитида бартараф этишнинг оддий усуллари мавжуд.
Муҳим: тавсиялар юрак тез уриши фақат ташқи омил сабабли юзага келганда ёрдам беради.
- Бунинг учун чуқур нафас олиш машқидан фойдаланишингиз мумкин. Аввало, қулай ўтириб олинг, сўнг чуқур ва секин нафас олинг ва нафасни 10 сония ушлаб туринг. Нафас чиқаринг. Бундай машқни юрак пулси нормал ҳолатга келгунча такрорлаш керак (одатда 5-10 марта бажарилганда ёрдам беради).
- Ноқулай ва тор кийимларни ечинг ёки бўшаштиринг.
- Жимжилоқ бармоқни енгил массаж қилинг. Кичкина бармоқнинг тирноқ соҳасини тахминан 60 марта босиш керак. Машқни иккала қўлда такрорлаш мумкин.
- Ярим стакан сув ичинг. Сувни аста-секин, шошилмай ва ўтирган ҳолатда ичиш керак.
Агар сизда тахикардия ҳолатлари тез-тез такрорланиб турса, шифокор кўригидан ўтишни кечиктирманг. Саломатлигингизга эътиборли бўлинг!
Изоҳ (0)