Singapore Airlines (SIA) 20-may kuni og‘ir turbulentlikka duch kelgan, o‘nlab kishilar jarohatlangan va bir kishi halok bo‘lgan SQ 321 reysi bortidagi yo‘lovchilarga tovon puli to‘laydi.

Xabarga ko‘ra, yengil jarohat olgan yo‘lovchilarga 10 000 dollar miqdorida tovon puli taklif qilinadi.

Og‘ir jarohat olgan va uzoq muddatli davolanishni talab qiladigan hamda moliyaviy yordam so‘raganlarga 25 ming dollar avans taklif qilinmoqda, — deyiladi aviakompaniyaning Facebook sahifasida.

Biroq og‘ir jarohatlar bo‘yicha yakuniy kompensatsiya 25 000 dollardan yuqori bo‘lishi mumkin. Aviakompaniya ushbu summa yo‘lovchilar oladigan yakuniy tovonning bir qismi bo‘lishini qo‘shimcha qilgan. Yakuniy miqdor jabrlanuvchilar bilan ularning sog‘lig‘i imkon berganda muhokama qilinadi. 

Bundan tashqari, aviakompaniya 20-may kuni SQ 321 reysi bo‘yicha parvoz qilgan barcha yo‘lovchilarga, jumladan, hech qanday jarohat olmaganlarga aviachiptalar narxini to‘liq qaytarishga va’da bergan.

Singapur havo yo‘llari Bangkokdan Singapurga uchayotgan yo‘lovchilarga 1000 Singapur dollari (684 yevro) taqdim etganini aytgan.

SIA jarohatlangan yo‘lovchilarning tibbiy xarajatlarini qopladi hamda ularning oila a’zolari va yaqinlarining iltimosiga ko‘ra, Bangkokka parvozini tashkil qildi, — deyiladi bayonotda.

Singapore Airlines SQ 321 reysidagi turbulentlik hodisasi

Joriy yilning 20-may kuni Boeing 777-300ER yo‘lovchi samolyoti Londondan Singapurga SQ 321 reysini amalga oshirayotganda turbulentlikka duch kelgan edi. Samolyot ekipaji parvozni Bangkokka yo‘naltirishga qaror qilgan hamda u yerda favqulodda qo‘nishni amalga oshirgan. Samolyot bortida 211 yo‘lovchi va 18 ekipaj a’zosi bo‘lgan.

Myanma ustida 10 soatlik parvozdan so‘ng to‘satdan kuchli turbulentlik boshlangan. Hodisa oqibatida 73 yoshli Britaniya fuqarosi vafot etgan. Dastlabki ma’lumotlarga ko‘ra, u turbulentlik paytida yurak xurujiga uchragan.