Singapore Airlines aviakompaniyasining kuchli havo girdobiga duch kelgan reysi bortida bir kishi halok bo‘ldi, 70 dan ortiq kishi jarohat oldi. Bu haqda tegishli manbalarga tayanib, Deutsche Welle xabar berdi.
Boeing 777-300ER yo‘lovchi samolyoti Londondan Singapurga SQ 321 reysini amalga oshirayotganda turbulentlikka duch kelgan. Samolyot ekipaji parvozni Bangkokka yo‘naltirishga qaror qilgan hamda u yerda favqulodda qo‘nishni amalga oshirgan. Samolyot bortida 211 yo‘lovchi va 18 ekipaj a’zosi bo‘lgan.
Myanma ustida 10 soatlik parvozdan so‘ng to‘satdan kuchli turbulentlik boshlangan. Hodisa oqibatida 73 yoshli Britaniya fuqarosi vafot etgan. Dastlabki ma’lumotlarga ko‘ra, u turbulentlik paytida yurak xurujiga uchragan.
Singapore Airlines nomidan marhumning oila aʼzolari va yaqinlariga chuqur hamdardlik bildiraman, — dedi aviakompaniya bosh direktori Go Choon Fong videomurojaatida.
Hodisani Singapurning Transport xavfsizligini tekshirish byurosi (TSIB) va AQSH Milliy transport xavfsizligi kengashi tekshirmoqda.
Izoh (0)