Singapore Airlines (SIА) 20 май куни оғир турбулентликка дуч келган, ўнлаб кишилар жароҳатланган ва бир киши ҳалок бўлган SQ 321 рейси бортидаги йўловчиларга товон пули тўлайди.

Хабарга кўра, енгил жароҳат олган йўловчиларга 10 000 доллар миқдорида товон пули таклиф қилинади.

Оғир жароҳат олган ва узоқ муддатли даволанишни талаб қиладиган ҳамда молиявий ёрдам сўраганларга 25 минг доллар аванс таклиф қилинмоқда, — дейилади авиакомпаниянинг Facebook саҳифасида.

Бироқ оғир жароҳатлар бўйича якуний компенсация 25 000 доллардан юқори бўлиши мумкин. Авиакомпания ушбу сумма йўловчилар оладиган якуний товоннинг бир қисми бўлишини қўшимча қилган. Якуний миқдор жабрланувчилар билан уларнинг соғлиғи имкон берганда муҳокама қилинади. 

Бундан ташқари, авиакомпания 20 май куни SQ 321 рейси бўйича парвоз қилган барча йўловчиларга, жумладан, ҳеч қандай жароҳат олмаганларга авиачипталар нархини тўлиқ қайтаришга ваъда берган.

Сингапур ҳаво йўллари Бангкокдан Сингапурга учаётган йўловчиларга 1000 Сингапур доллари (684 евро) тақдим этганини айтган.

SIА жароҳатланган йўловчиларнинг тиббий харажатларини қоплади ҳамда уларнинг оила аъзолари ва яқинларининг илтимосига кўра, Бангкокка парвозини ташкил қилди, — дейилади баёнотда.

Singapore Airlines SQ 321 рейсидаги турбулентлик ҳодисаси

Жорий йилнинг 20 май куни Boeing 777-300ER йўловчи самолёти Лондондан Сингапурга SQ 321 рейсини амалга ошираётганда турбулентликка дуч келган эди. Самолёт экипажи парвозни Бангкокка йўналтиришга қарор қилган ҳамда у ерда фавқулодда қўнишни амалга оширган. Самолёт бортида 211 йўловчи ва 18 экипаж аъзоси бўлган.

Мьянма устида 10 соатлик парвоздан сўнг тўсатдан кучли турбулентлик бошланган. Ҳодиса оқибатида 73 ёшли Британия фуқароси вафот этган. Дастлабки маълумотларга кўра, у турбулентлик пайтида юрак хуружига учраган.