ҲАМАС Бирлашган Миллатлар Ташкилоти Хавфсизлик кенгашининг Ғазода доимий ўт очишни тўхтатишга чақирувчи резолюциясини олқишлашини билдирди.
ҲАМАС Ғазодан қўшинларни тўлиқ олиб чиқиш, асирларни алмашиш, кўчирилганларни ўз яшаш жойларига қайтариш, ҳар қандай демографик ўзгаришларни ёки ҳудудни қисқартириш каби чораларни рад этишни, ғазоликларга зарур ёрдам кўрсатишни олқишлайди, — дейилади баёнотда.
Шунингдек, гуруҳ халқ талаблари ва қаршиликларига мос келадиган ушбу тамойилларни амалга ошириш бўйича билвосита музокаралар олиб бориш учун ҳамкорлик қилишга тайёрлигини таъкидлаган.
Аввалроқ БМТ Хавфсизлик кенгаши Ғазо секторида ўт очишни тўхтатиш ва гаровдагиларни озод этиш бўйича АҚШ резолюциясини қўллаб-қувватлаганди.
Хавфсизлик кенгашининг 15 аъзосидан 14 нафари ҳужжатга овоз берган, Россия эса бетараф қолган. АҚШ таклиф қилган резолюция етти банддан иборат бўлиб, улардан биринчиси ҲАМАСни келишувни қабул қилишга ҳамда “барча томонларни унинг қоидаларини ҳеч қандай шартларсиз тўлиқ бажаришга чақиради”.
АҚШнинг оташкесим режаси
31 май куни АҚШ президенти Жо Байден уч босқичдан иборат янги тинчлик битими лойиҳаси шартларини эълон қилди. Биринчиси олти ҳафтага мўлжалланган бўлиб, тўлиқ ўт очишни тўхтатиш, Исроил қўшинларини Ғазонинг аҳоли пунктларидан олиб чиқиб кетиш, юзлаб фаластинлик маҳбусларни қамоқдан озод қилиш эвазига ҲАМАС томонидан гаровга олинганларни озод этишни назарда тутади.
Шунингдек, ушбу даврда томонлар музокараларни бошлашлари керак ва ўзаро келишувга эришилгунга қадар сулҳ ўз кучида қолади. Иккинчи босқич барча гаровга олинганларни, жумладан, ҳарбий хизматчиларни ҳам озод қилишни назарда тутади. Учинчи босқичда Ғазо секторини тиклаш ва ҳалок бўлган исроилликларнинг жасадларини яқинларига топшириш кўзда тутилган.
Изоҳ (0)