Birlashgan millatlar tashkiloti Xavfsizlik kengashi G‘azo sektorida o‘t ochishni to‘xtatish va garovdagilarni ozod etish bo‘yicha AQSH rezolyutsiyasini qo‘llab-quvvatladi. Bu haqda “TASS” xabar berdi.
Xavfsizlik kengashining 15 a’zosidan 14 nafari hujjatga ovoz bergan, Rossiya esa betaraf qolgan. AQSH taklif qilgan rezolyutsiya yetti banddan iborat bo‘lib, ulardan birinchisi HAMASni kelishuvni qabul qilishga hamda “barcha tomonlarni hech qanday shartlar va kechiktirmasdan uning qoidalarini to‘liq bajarishga chaqiradi”.
Bundan tashqari, agar sulh bo‘yicha maslahatlashuvlar olti haftadan ko‘proq vaqtga cho‘zilsa, “o‘t ochishni to‘xtatish ham muzokaralar davom etgunga qadar amalda bo‘ladi”.
Rezolyutsiya BMTga aʼzo barcha mamlakatlarni kelishuvni amalga oshirishni qo‘llab-quvvatlashga chaqiradi, Isroil va Falastin o‘rtasidagi ziddiyatni ikki davlatning tinch-totuv yashashi asosida hal etish tarafdori ekanini yana bir bor tasdiqlaydi.
AQSHning otashkesim rejasi
31-may kuni AQSH prezidenti Jo Bayden uch bosqichdan iborat yangi tinchlik bitimi loyihasi shartlarini e’lon qildi. Birinchisi olti haftaga mo‘ljallangan bo‘lib, to‘liq o‘t ochishni to‘xtatish, Isroil qo‘shinlarini G‘azoning aholi punktlaridan olib chiqib ketish, yuzlab falastinlik mahbuslarni qamoqdan ozod qilish evaziga HAMAS tomonidan garovga olinganlarni ozod etishni nazarda tutadi.
Shuningdek, ushbu davrda tomonlar muzokaralarni boshlashlari kerak va o‘zaro kelishuvga erishilgunga qadar sulh o‘z kuchida qoladi. Ikkinchi bosqich barcha garovga olinganlarni, jumladan, harbiy xizmatchilarni ham ozod qilishni nazarda tutadi. Uchinchi bosqich G‘azo sektorini tiklash va halok bo‘lgan isroilliklarning jasadlarini yaqinlariga topshirish.
Izoh (0)