O‘zbekiston Xalqaro mehnat tashkiloti Maʼmuriy kengashi aʼzoligiga saylandi

O‘zbekiston tarixda ilk marotaba Xalqaro mehnat tashkiloti Maʼmuriy Kengashi aʼzoligiga saylandi. Bu haqda Senat matbuot xizmati xabar berdi. 

Maʼlum qilinishicha, Jeneva shahrida davom etayotgan Xalqaro mehnat konferensiyasining 112-sessiyasi doirasida bo‘lib o‘tgan Xalqaro mehnat tashkiloti Maʼmuriy Kengashi aʼzoligiga saylovlarda Yevropa hududidan eng ko‘p ovoz to‘plab O‘zbekiston kengash aʼzoligiga saylangan.

“Bu o‘z o‘rnida O‘zbekistonning global mehnat siyosatida faol ishtirok etishiga, Xalqaro mehnat tashkiloti tomonidan qabul qilinayotgan qarorlarda, mehnat munosabatlari tizimini takomillashtirish yuzasidan yangi taklif va g‘oyalarning ishlab chiqilishida bevosita O‘zbekistoning ham faol ishtirok etishiga yangi imkoniyatlarni ochadi”, — deyiladi xabarda.

Eslatib o‘tamiz, 2022-yil 10-mart kuni Cotton Campaign xalqaro koalitsiyasi O‘zbekiston paxtasiga e’lon qilingan global boykotni bekor qilgan edi.

Prezident matbuot kotibi Sherzod Asadov O‘zbekiston paxtasiga qo‘yilgan boykotni bekor qilish to‘g‘risidagi qarorini olqishlashini ma’lum qilgan.

Prezident Shavkat Mirziyoyev Cotton Campaign O‘zbekistonni qora ro‘yxatidan chiqargani ham juda katta imkoniyat ekanligini” ta’kidlagan edi. “Buning hisobiga iste’mol mahsulotlarining xomashyosini olib kelib, ularni qayta ishlash orqali qo‘shimcha 1,5 milliard dollarlik mahsulotni bemalol eksport qilsa bo‘ladi”, — degan edi davlat rahbari.