“Manfaatlar to‘qnashuvi to‘g‘risida”gi qonun ijrosini tashkil etish ishlarini muvofiqlashtirish bo‘yicha bosh vazir raisligidagi Respublika idoralararo komissiyasi faoliyati tashkil etildi. Bu haqda prezidentining “Manfaatlar to‘qnashuvi to‘g‘risida”gi qonuni ijrosini samarali tashkil etish chora-tadbirlari to‘g‘risida”gi qarorida qayd etilgan.
Qarorga ko‘ra, Korrupsiyaga qarshi kurashish agentligi va Adliya vazirligi Respublika idoralararo komissiyasining ishchi organlari etib belgilandi.
Ikkinchidan, qaror bilan Respublika idoralararo komissiyasi tomonidan 2024-yilda amalga oshiriladigan ishlar yuzasidan “Yo‘l xaritasi” tasdiqlandi.
Uchinchidan, 1-iyulga qadar “Manfaatlar to‘qnashuvi to‘g‘risida”gi qonun tatbiq etiladigan davlat organlari va tashkilotlarining aniq ro‘yxati shakllantiriladi;
To‘rtinchidan, davlat organlari va tashkilotlarida manfaatlar to‘qnashuviga yo‘l qo‘yilganlik, yoki unga olib kelishi mumkin bo‘lgan holatlar o‘rganilib, ularni tartibga solish ishlari amalga oshiriladi. Xususan:
- yaqin qarindoshlarning bevosita bo‘ysunuvda yoki nazorat yo‘nalishidagi ishlayotganlik holati;
- xodimlarning tadbirkorlik faoliyatida ishtirok etish holatlari;
- yaqin qarindoshi ishlayotgan obyektni tekshirishda ishtirok etish holatlari;
- ishdan bo‘shagan xodimning o‘z ish joyida bevosita nazoratida bo‘lgan tashkilotlarga ishga kirish holatlari;
- nazoratida bo‘lgan tadbirkorlik faoliyati subyektining aksiyalariga yoki ustav fondidagi ulushlariga yoxud ularning boshqaruv organi a’zosi bo‘lgan holatlarini;
- davlat xaridlarini amalga oshirish va davlat mulkini xususiylashtirish jarayonida manfaatlar to‘qnashuviga yo‘l qo‘yganlik holatlari o‘rganiladi.
Korrupsiyaga qarshi kurashish agentligi direktori Akmal Burxonovning ma’lum qilishicha, dastlabki tahlillarga ko‘ra, jami 27 mingdan ortiq davlat tashkilotlari faoliyati o‘rganib chiqilishi va ularda aniqlangan manfaatlar to‘qnashuvini tartibga solish choralari ko‘riladi. Shuningdek, davlat ulushi bo‘lgan 2 mingdan ortiq yuridik shaxslarning davlat xaridlarini belgilangan tartibga rioya qilinishi ta’minlash yuzasidan amaliy ko‘mak berish ishlari amalga oshiriladi.
Izoh (0)