Qashqadaryolik mehnat faxriysi Odil Boboyev o‘qituvchilik yillarini eslab, 43 yillik faoliyati davomida o‘quvchilardan davlat imtihonini dala shiyponida olganini, nafaqat o‘quvchilar, o‘qituvchilar ham bir yilda olti oylab paxta dalasida yurganini esga oldi.
“Hozirgi zamonga shukrona keltirib yashashimiz kerak, boisi tarixda bunaqa zamon bo‘lmagan. Buni men tengi bobolarning ko‘pi o‘z ko‘zi bilan ko‘rgan. Biz taʼlimda ishlagan paytlarda shunaqa vaziyatlar bo‘lganki, davlat va kirish imtihonini dala shiyponida olganmiz. Bir yilda olti oy paxta dalasida bo‘lganmiz. 4-maydan dalaga yagona, o‘toq deb chiqib ketib, dekabr oxirida uyga qaytganmiz. Paxta mavsumidan so‘ng ko‘cha tozaligi-yu, ariqlarni tozalash ishlari bilan shug‘ullanganmiz. Shunaqa zamonda yashagan xalqimizga rahmat aytaman. Talabalar o‘qishga bir qo‘lida sumka, bir qo‘lida belkurak ko‘tarib kelardi. Odamlar ham men bolamni darsga jo‘natyapman, nega o‘qishda emas deb biror marta eʼtiroz bildirmagan. Shuning uchun ham prezidentimizga ming rahmat, bunaqa imkoniyat yaratish qahramonlik”, — deydi mehnat faxriysi Odil Boboyev.
Mehnat faxriysining taʼkidlashicha, prezident Shavkat Mirziyoyev tashabbusi bilan bugun taʼlimda ishlovchilarga yaxshi imtiyozlar berildi, tadbirkorlarga keng imkoniyat yaratildi.
“Qarangki, o‘sha paytda o‘zimizning kelajagimizga bolta urib, yuqoridan kelgan topshiriqni bajarish uchun hamma narsadan voz kechdik. O‘zimiz ham shunday qilganmiz. Endichi, endi shunaqa yaxshi zamonda yashayapmizki, buni qadriga yetishimiz kerak. O‘zbekistonda imkoniyat va sharoit bor, shunday rivojlanishda davom etsak, eng rivojlangan davlatga aylanamiz”, — deydi mehnat faxriysi.
Eslatib o‘tamiz, "Menimcha" ko‘rsatuvining efirga berilgan navbatdagi sonida uzoq yillik paxta siyosati o‘zbek millatini ne ko‘ylarga solgani haqida so‘z borgandi.
"Biz uzoq yillar davomida ‘paxta kishani’dan voz kecholmadik, ‘paxta quli’ degan tavqi-lan’atni peshonamizdan yuvib tashlashga qo‘limiz bormadi. Paxta dalasiga bodroqday to‘kilgan yosh-yosh bolalar, maktabda o‘qish o‘rniga qo‘lini qonatib, chanoq changallagan o‘quvchilar, dala quyoshida kuyib ketgan kasalmand go‘daklar hali hech qaysimizning esimizdan chiqqani yo‘q, chiqmaydi ham. Bu sizu bizning yaqin o‘tmishdagi kechmishimiz edi", — deya qayd etgandi ko‘rsatuv muallifi Xayrulla Nuriddinov.
Izoh (0)