Fransiya hukumati Ukrainaga Mirage 2000 jangovar samolyotlarini yetkazib beradi. Bu haqda Fransiya prezidenti Emmanuel Makron davlat televideniyesida bergan bayonotga asoslanib, Reuters nashri xabar berdi.
Emmanuel Makron bu haqda 6-iyun kuni maʼlum qilgan. Mirage 2000 yaqin muddatda Kiyevga topshirilishi maʼlum qilingan.
Manbada aytilishicha, Ukraina prezidenti Vladimir Zelenskiy 7-iyun kuni Fransiyaga tashrif buyurishi oldidan Fransiya prezidenti yangi harbiy yordamning boshlang‘ich tafsilotlarini ochiqlagan.
Parijdagi hukumat rahbari Mirage 2000 samolyotlari qancha miqdorda va qanday yetkazib berilishi haqidagi savollarni ochiq qoldirgan. Prezident harbiy texnikalar qanday moliyaviy shartlar asosida taqdim etilishini ham maʼlum qilmagan.
Manbada aytilishicha, Fransiya shu yilning yozida Parijda ukrainalik uchuvchilarni o‘qitishni boshlaydi. Ular uchun maxsus o‘quv zonasi tashkil etiladi.
Fransiya Ukraina rasmiylariga murojaat yo‘llab, 4500 nafar ukrain askarini tayyorlashni taklif qilgan. Askarlar qayerda o‘qitilishi haqida hozircha maʼlumot berilmagan.
Maʼlumot o‘rnida, Mirage 2000 ko‘p funksiyali, bir dvigatelli reaktiv qiruvchi samolyotdir. Ushbu samolyotlari Ukraina harbiy-havo kuchlari safiga Fransiya tomonidan kelasi yilning yanvar oyida yetkazib berilishi haqida xabar qilingan.
Izoh (0)