Rossiya politsiyasi 6-iyun kuni mamlakat ichida razvedka maʼlumotlarini to‘plashda gumonlangan fransiyalik tadqiqotchini qo‘lga oldi. Bu haqda Rossiya mahalliy nashrlariga tayanib, Reuters manbasi xabar berdi.
Manbada aytilishicha, Shveysariyada joylashgan “Gumanitar muloqot markazi” notijorat tashkilotining Rossiya va Yevrosiyo bo‘yicha maslahatchi bo‘lib ishlagan 47 yoshli Loran Vinatye hibsga olingan. Moskvadagi hukumat uni rossiyalik harbiylar haqida maʼlumot yig‘ishda ayblagan.
“Gumanitar muloqot markazi” notijorat tashkiloti tadqiqotchining hibsga olinganini tasdiqlagan. Ayni paytda tashkilot olimning Fransiya hukumati uchun ishlaganini rad etgan.
Rossiya Davlat tergov qo‘mitasi fransuz olimini bir necha yil davomida Rossiya Federatsiyasining harbiy va harbiy-texnik faoliyati sohasida davlat xavfsizligiga qarshi ishlatilishi mumkin bo‘lgan maʼlumotlarni to‘plab kelganlikda ayblagan. U shu ayblov bo‘yicha 5 yilga ozodlikdan mahrum qilinishi mumkin.
Tadqiqotchi hibsga olinishi bilan bog‘liq hodisa haqida Fransiya prezidenti Emmanuel Makron ham munosabat bildirgan. Makron hodisani Rossiya tashviqotining namunasi deb taʼriflagan. U ,shuningdek, hibsga olingan tadqiqotchi BMTning sobiq Bosh kotibi Kofi Annan tomonidan asos solingan, diplomatiya va muhokama ishlari bilan shug‘ullanuvchi Shveysariya nodavlat tashkilotida ishlaganini, hukumatning razvedka faoliyati bilan hech qanday aloqasi yo‘qligini maʼlum qilgan.
Fransiya rasmiylari Loran Vinatyening ozod qilinishi uchun harakat qilishlarini bildirishgan. Har qanday holatda ham Vinatye Fransiya uchun ishlamagani taʼkidlangan.
Loran Vinatye 1999-yildan buyon Ispaniya, Filippin va Liviya kabi mamlakatlarda muloqot va vositachilik orqali qurolli mojarolarning oldini olish, yumshatish va hal qilishga yordam berish dasturlarida ishlagan. U, shuningdek, Shveysariyada joylashgan “Gumanitar muloqot markazi” notijorat tashkilotining Rossiya va Yevrosiyo bo‘yicha maslahatchisi sifatida 10 yilga yaqin ishlagan.
Olim chechen diasporasi bo‘yicha doktorlik dissertatsiyasini tamomlagan va Yevropaning turli universitetlarida xalqaro munosabatlar va siyosiy iqtisod bo‘yicha maʼruzalar qilgan. U Rossiya, Kavkaz va Markaziy Osiyo bo‘yicha bir qancha kitoblar va kitob bo‘limlari muallifi hisoblanadi.
Izoh (0)