Suriyalik erkak 3-iyun kuni Isroilning Ruminiyadagi elchixonasi yaqinida portlash sodir etgan. Bu haqda Roya News nashri xabar berdi.
Manbada aytilishicha, fuqaro shisha idishda qo‘lbola portlovchi modda hosil qilgan hamda uni Buxarestdagi Isroil elchixonasining qabulxonasiga kirish eshigida portlatgan. Tergovchilar portlatilgan modda “Molotov kokteyli” ekanini maʼlum qilib, uloqtiriluvchi qo‘lbola portlovchi aralashma ekanini bildirishgan.
Hodisa oqibatida elchixona binosiga hech qanday shikast yetmagan. Halok bo‘lganlar va yaralanganlar haqida ham maʼlumot taqdim qilinmagan.
Ruminiyaning Digi24 telekanali xabar berishicha, suriyalik erkak portlash sodir etgan joyida zudlik bilan hibsga olingan. Politsiya uni tergov uchun olib ketgan.
Rasmiylar portlash oqibatida kichik yong‘in kelib chiqqani va tezda o‘chirilganini maʼlum qilgan. Portlash sodir etgan erkak o‘zini ham yoqib yuborishga uringan.
- Maʼlumot o‘rnida, 1-iyun kuni Meksika poytaxti Mexiko shahrida Falastinni qo‘llab namoyishga chiqqan 200 nafar fuqaro Isroil elchixonasiga o‘t qo‘ygan edi.
- Hodisa oqibatida binoning ancha qismi yonib ketgan. Namoyishchilarning ko‘pchiligi politsiya tomonidan hibsga olingan.
- Joriy yilning aprel oyida Toshkentda ham Isroil elchixonasi binosiga kerosin to‘ldirilgan shisha idish uloqtirgan shaxs qo‘lga olingan edi.
- Tergov jarayonida bu shaxs O‘zbekiston davlat jahon tillari universitetining 2-bosqich talabasi, 20 yoshli yigit ekani maʼlum qilingan.
- Yigit jinoyat kodeksining 155-moddasi (terrorizm) 1-qismida nazarda tutilgan jinoyatni sodir etganlikda aybli deb topilib, unga nisbatan 5 yil ozodlikdan mahrum qilish jazosi tayinlangan.
Izoh (0)