“Ukraina Falastinni ham tan oladi, Isroilni to‘xtatish uchun qo‘lidan kelganini qiladi” — Zelenskiy

Ukraina prezidenti Vladimir Zelenskiy mamlakatning G‘azo sektoridagi vaziyat bo‘yicha pozitsiyasini xolis baholashga chaqirdi. Prezident Ukraina Isroilni ham, Falastinni ham tan olishini ta’kidladi. Bu haqda u “Dialog – Shangri La” anjumanida ma’lum qildi.

Zelenskiy Yaqin Sharqdagi mojaroga barham berishda Ukraina qo‘lidan kelgan hamma narsani qilishi, mamlakat xalqaro huquq va BMT nizomini hurmat qilishini ta’kidladi.

“Ukraina, agar HAMAS jangchilari Isroilning tinch aholisiga hujum qilgan bo‘lsa, Isroil o‘zini himoya qilish huquqiga ega ekanini aytgan”, — deb tushuntirdi siyosatchi.

Ukraina prezidenti Isroil harbiylari G‘azo sektoriga kirgach va gumanitar inqiroz yuzaga kelgach, Ukraina G‘azoga gumanitar yordam ko‘rsatmoqchi bo‘lganini eslatdi. Bundan tashqari, Ukraina mintaqada xalqaro huquq normalarini hurmat qilish muhimligini bildirdi.

“Ukraina ham Isroilni, ham Falastinni davlat sifatida tan oladi va ushbu mojaro yakunlanishi hamda tinch aholi jabr ko‘rmasligi uchun Isroilni to‘xtatish maqsadida qo‘lidan kelgan barcha narsani qiladi”, — dedi u.