Isroilning G‘azodagi harbiy amaliyotlari yana kamida 7 oy davom etishi mumkin. Bu haqda Isroil Milliy xavfsizlik kengashi taqdim etgan hisobotga asoslanib, Sputnik International nashri xabar berdi.
Manbada aytilishicha, Milliy xavfsizlik kengashi rahbari Saxi Hanegbi janglar 2024-yil oxirigacha davom etishini bildirgan. Bu haqda Isroil rasmiysi 29-may kuni tashkil etilgan matbuot konferensiyasi doirasida maʼlum qilgan.
Konferensiyada Isroil armiyasi G‘azo sektori va Misr chegarasi bo‘ylab o‘tuvchi Filadelfiya koridorining 75 foizini nazorat qilayotgani aytilgan. Koridorning muhim qismlari, masalan, gumanitar yordam kiradigan Rafah o‘tkazish punkti yaqin orada ochilmasligi bildirilgan.
Saxi Hanegbi ayni paytda Isroil bosh vaziri Binyamin Netanyaxuning milliy xavfsizlik bo‘yicha maslahatchisi ham hisoblanadi. U, shuningdek, HAMAS harakatini butunlay yo‘q qilish hamda G‘azo shimolini Isroilga qo‘shib olish tarafdorlaridan biri.
Oldinroq Isroil hukumati HAMAS bilan kelishuv shartlarini yumshatgani xabar qilingan edi. Tel-Aviv rasmiylari yangicha kelishuv shartlarini vositachi davlatlar — AQSH, Misr va Qatarga topshirgan.
Isroil garovga olinganlarni almashish va o‘t ochishni to‘xtatishga bir qancha shartlar asosida rozilik bildirgan. Bu yangi loyihadan so‘ng G‘azoda keskinliklar birmuncha vaqt to‘xtashi mumkinligi aytilgan.
Izoh (0)