Farg‘ona viloyati hokimi Xayrullo Bozorov Xitoyning China Triumph International Engineering hamda China Xiaou Group kompaniyalari rahbarlaridan iborat delegatsiyani qabul qildi. Bu haqda viloyat hokimligi matbuot xizmati xabar berdi.
Maʼlum qilinishicha, uchrashuvda viloyat hududida Xitoy avtomobilsozlik texnoparki tashkil etish hamda yangi brend ostida butlovchi qismlari mahalliylashtirilgan avtomobillar ishlab chiqarish loyihasi muhokama qilindi.
Loyihaning birinchi bosqichida Xitoydan keltirilgan qismlarni yig‘ish, bo‘yash hamda sozlash liniyalarini yo‘lga qo‘yish orqali yillik 60 ming dona gaz, elektr va gibrid motorli avtomobillar, maxsus transport vositalari ishlab chiqarish belgilangan. Keyingi bosqichda tashkil etiladigan Xitoy avtomobilsozlik texnoparkida barcha butlovchi qismlarni ishlab chiqarish korxonalari tashkil etish hamda ularni kooperatsiyasini tashkil etish orqali ishlab chiqariladigan avtomobillar sonini yillik 1 mln donaga yetkazish loyiha-rejada ko‘zda tutilgan.
Buning uchun jami 200 gektar yer maydoni talab etilishi maʼlum qilindi. Ishlab chiqariladigan avtomobillar yangi, mahalliy brend ostida bo‘lishi reja qilingan. Tashkil etilishi taklif etilayotgan Xitoy avtomobilsozlik texnoparkiga o‘nlab Xitoy kompaniyalarining investitsion ishlab chiqarish loyihalarini joylashtirishi rejalashtirilgani bildirildi.
Xitoylik investorlar tomonidan qisqa muddat ichida amalga oshiriladigan investitsion loyihalarning aniq amalga oshirish muddati, kiritiladigan sarmoyalarning miqdori hamda yaratiladigan ish o‘rinlari soni bo‘yicha aniq asoslangan biznes-rejani ishlab chiqilishiga hamda muzokalarni davom ettirishga kelishib olindi.
Izoh (0)