Farg‘ona viloyati hokimi Xayrullo Bozorov Jidda shahrida Bahra Electrics kompaniyasi rahbari Fahed Talal Idris bilan uchrashuv o‘tkazdi. Bu haqda viloyat hokimligi matbuot xizmati xabar berdi.
Maʼlum qilinishicha, uchrashuvda Farg‘onada yirik ishlab chiqarish investitsion loyihasini amalga oshirish bo‘yicha muzokaralar olib borildi.
Uchrashuvda viloyat hokimi ushbu korxona imkoniyatlarini yuqori baholadi, O‘zbekistonda arzon va yetarli xomashyo mavjudligini qayd etgan Xayrullo Bozorov, yurtimizdagi investorlar uchun yaratilgan soliq imtiyozlari, bozor imkoniyatlari, qo‘shni davlatlarga logistika va eksport qulayliklariga to‘xtalib o‘tdi.
Viloyat hokimi Turkiyadan mis xomashyosini sotib olayotganini qayd etgan Fahed Talal Idrisga, O‘zbekistonda mis ishlab chiqarish hajmi yuqori ekani, O‘zbekiston prezidentining sohaga alohida eʼtiborlari natijasida respublikamizda mis xom ashyosini chuqur qayta ishlash asosida yuqori qo‘shilgan qiymatli tayyor mahsulotlar ishlab chiqarish quvvatlarini barpo etish masalasiga katta eʼtibor qaratilayotgani, bu yo‘nalishda ish olib borayotgan tadbirkorlar har tomonlama qo‘llab-quvvatlanayotganini bildirdi.
Uchrashuvda Farg‘ona viloyati hokimligi, Bahra Electrics kompaniyasi hamda Kuvaytning Energy Solutions kompaniyalari o‘rtasida viloyatimiz hududida misni chuqur qayta ishlash hamda elektr kabellari ishlab chiqarish korxonalari tashkil etishni ko‘zda tutgan anglashuv memorandumi imzolandi.
Bu loyihalarni amalga oshirish uchun qo‘shma ishchi guruh tuzishga kelishib olindi.
Izoh (0)