Turkiya mudofaa vaziri Yashar Gyuler Turkiya-Suriya chegarasi xavfsiz bo‘lsa, Anqara Suriyadan qo‘shinlarini olib chiqib ketishi mumkinligini aytdi. Bu haqda TRT Haber telekanali xabar berdi.
Mudofaa vazirining so‘zlariga ko‘ra, Turkiya konstitutsiyani qabul qilish, erkin saylovlar o‘tkazish va mamlakatdagi vaziyatni normallashtirishda Suriya hukumatini qo‘llab-quvvatlashga tayyor.
“Bu amalga oshirilgandan va chegaramiz to‘liq himoyalanganidan keyingina biz qo‘shinlarni olib chiqish masalasini ko‘rib chiqishimiz mumkin”, — dedi vazir.
Avvalroq Turkiya prezidenti Rajab Toyyib Erdo‘g‘on Suriya shimoli va Iroqdan kelayotgan terrorchilik tahdidiga qarshi turishda davom etishlarini ta’kidlagandi.
“Turkiya o‘zining hududiy yaxlitligi va xalqining xavfsizligi haqida gap ketganda hech qanday tahdidga bosh egmaydi. Biz avvalgidek hech ikkilanmasdan terrorizmga qarshi kurashda qat’iy choralar ko‘rishga tayyormiz”, — degan u.
Anqaradagi hukumat 2016-yildan beri Suriya shimolida terrorchilar koridorining shakllanishiga yo‘l qo‘ymaslik va aholining tinch yo‘l bilan uy-joylariga qaytishini taʼminlash maqsadida chegara hududi bo‘ylab aksilterror operatsiyalarini o‘tkazib keladi. “Furot qalqoni” (2016), “Zaytun novdasi” (2018) va “Tinchlik bahori” (2019) operatsiyalari hozirga qadar davom ettirilmoqda.
Maʼlumot o‘rnida, Kurdiston ishchi partiyasi 40 yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 ming nafardan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)