Туркия мудофаа вазири Яшар Гюлер Туркия-Сурия чегараси хавфсиз бўлса, Анқара Суриядан қўшинларини олиб чиқиб кетиши мумкинлигини айтди. Бу ҳақда TRT Haber телеканали хабар берди.
Мудофаа вазирининг сўзларига кўра, Туркия конституцияни қабул қилиш, эркин сайловлар ўтказиш ва мамлакатдаги вазиятни нормаллаштиришда Сурия ҳукуматини қўллаб-қувватлашга тайёр.
“Бу амалга оширилгандан ва чегарамиз тўлиқ ҳимояланганидан кейингина биз қўшинларни олиб чиқиш масаласини кўриб чиқишимиз мумкин”, — деди вазир.
Аввалроқ Туркия президенти Ражаб Тоййиб Эрдўғон Сурия шимоли ва Ироқдан келаётган террорчилик таҳдидига қарши туришда давом этишларини таъкидлаганди.
“Туркия ўзининг ҳудудий яхлитлиги ва халқининг хавфсизлиги ҳақида гап кетганда ҳеч қандай таҳдидга бош эгмайди. Биз аввалгидек ҳеч иккиланмасдан терроризмга қарши курашда қатъий чоралар кўришга тайёрмиз”, — деган у.
Анқарадаги ҳукумат 2016 йилдан бери Сурия шимолида террорчилар коридорининг шаклланишига йўл қўймаслик ва аҳолининг тинч йўл билан уй-жойларига қайтишини таъминлаш мақсадида чегара ҳудуди бўйлаб аксилтеррор операцияларини ўтказиб келади. “Фурот қалқони” (2016), “Зайтун новдаси” (2018) ва “Тинчлик баҳори” (2019) операциялари ҳозирга қадар давом эттирилмоқда.
Маълумот ўрнида, Курдистон ишчи партияси 40 йилдан ортиқ вақтдан бери Туркия ва Яқин Шарқ ҳудудида террорчилик ҳужумлари ташкил этиб келади. Партия расман Туркия, АҚШ ва Европа Иттифоқи томонидан террорчи ташкилотлар рўйхатига киритилган. Партия уюштирган терактлар оқибатида умумий 40 минг нафардан ортиқ одам, жумладан, аёллар, болалар ва гўдаклар ҳалок бўлгани хабар қилинади.
Изоҳ (0)