Turkiya harbiylari 17-may kuni Suriya va Iroq shimolida Kurdiston ishchi partiyasiga aloqador 7 nafar jangarini yo‘q qilgan. Bu haqda Turkiya Milliy mudofaa vazirligi xabariga asoslanib, Anadolu nashri xabar berdi.
Xabarda aytilishicha, jangarilar “Panja-qilich” operatsiyasi davomida yo‘q qilingan. 4 nafar jangari Suriya shimolida va yana 3 nafar shaxs Iroq shimolidagi hududlarda yo‘q qilingan.
Milliy mudofaa vazirligi jangarilar bevosita Kurdiston ishchi partiyasiga aloqador bo‘lganini bildirgan. Suriya shimolidagi jangarilar “Furot qalqoni” maxsus operatsiyasi davomida yo‘q qilingani aytilgan.
Anqaradagi hukumat 2016-yildan beri Suriya shimolida terrorchilar koridorining shakllanishiga yo‘l qo‘ymaslik va aholining tinch yo‘l bilan uy-joylariga qaytishini taʼminlash maqsadida chegara hududi bo‘ylab aksilterror operatsiyalarini o‘tkazib keladi. “Furot qalqoni” (2016), “Zaytun novdasi” (2018) va “Tinchlik bahori” (2019) operatsiyalari hozirga qadar davom ettirilmoqda.
Maʼlumot o‘rnida, Kurdiston ishchi partiyasi 40 yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 ming nafardan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)