Turkiyada 50 ta davlat harbiy xizmatchilari ishtirokida EFES-2024 harbiy mashg‘ulotlari boshlandi. Turkiya prezidenti Rajab Toyyib Erdo‘g‘on mashg‘ulotlarni shaxsan kuzatib, u hech bir davlatga qarshi qaratilmaganini aytdi. Bu haqda Anadolu xabar berdi.
“Turkiya qurolli kuchlarining EFES-2024 mashqlari hech bir davlatga qarshi qaratilmagan. Ular tinchlikparvar operatsiyalarga yo‘naltirilgan umumiy ssenariy bo‘yicha amalga oshirilmoqda”, — dedi Turkiya prezidenti.
Mashg‘ulotlar Turkiyaning Izmir provinsiyasida bo‘lib o‘tmoqda. EFES-2024 ko‘p millatli mashg‘ulotlar bo‘lib, unda jami 11 ming harbiy xizmatchi, shu jumladan, 50 ta davlatdan 1,5 mingdan ortiq harbiylar ishtirok etmoqda.
Erdo‘g‘onning ta’kidlashicha, Turkiya o‘z manfaatlarini hurmat qilgan va u bilan hamkorlikka intilayotgan barcha davlatlar bilan muloqotga, aloqalarni mustahkamlashga tayyor. U Turkiyaning mudofaa sanoatidagi muvaffaqiyatlariga ham to‘xtalib o‘tdi. Jumladan, 2023-yilda sanoat tomonidan 185 davlatga 5,5 milliard dollarlik 230 turdagi mahsulot eksport qilingan.
“Shu davrda 10 milliard 240 million dollarlik yangi shartnomalar imzolandi”, — dedi siyosatchi.
U Turkiya Suriya shimoli va Iroqdan kelayotgan terrorchilik tahdidiga qarshi turishda davom etishini qo‘shimcha qildi.
“Turkiya o‘zining hududiy yaxlitligi va xalqining xavfsizligi haqida gap ketganda hech qanday tahdidga bosh egmaydi. Biz avvalgidek hech ikkilanmasdan terrorizmga qarshi kurashda qat’iy choralar ko‘rishga tayyormiz”, — dedi u.
Izoh (0)