Bosh prokuratura huzuridagi Majburiy ijro byurosining MIB organlaridagi qarzdorligi 513,2 million so‘mni tashkil etadi. Bu haqda “Revizor” Telegram kanali yozmoqda.
E’tibor qaratilishicha, qarzdorlik bo‘la turib Bosh prokuratura huzuridagi Majburiy ijro byurosi 735,5 million so‘mga ikki dona elektromobil xarid qilgan.
Mazkur holat yuzasidan MIB axborot xizmati “Daryo”ga tushuntirish berdi.
Ma’lum bo‘lishicha, Majburiy ijro byurosi Yunusobod tuman bo‘limi ish yurituvida, Toshkent tumanlararo iqtisodiy sudining ijro varaqasiga asosan, byurodan undiruvchi Caravan group MCHJ foydasiga 512 million 557 ming so‘m qarz va 30 ming so‘m pochta xarajati undirish ko‘rsatilgan.
Mazkur ijro hujjati byuroning Yunusobod tuman bo‘limiga 17-aprel kuni kelib tushgan. Amaldagi qonunchilikka muvofiq, ijro hujjati ixtiyoriy muddat tugagan kundan e’tiboran ikki oy ichida ijro etilishi belgilangan.
Yuqoridagilarga asosan, hujjatning ijrosi belgilangan muddatda amalga oshirilishi ta’minlanadi, — deyiladi byuro axborotida.
Avvalroq bolalar ombudsmaniga MIB xodimlari harakatidan norozilik bildirib, 2023-yilda fuqarolardan 33 ta murojaat kelib tushgani xabar qilingan edi.
Izoh (0)